ბათუმში დაღუპული ბავშვის მასწავლებელი: არ ვიცი, როგორ გავიარეთ ის დღე, როცა გავიგეთ, რომ ჩამოინგრა სახლი, სადაც ანასტასია ცხოვრობდა

ბათუმში, იქ, სადაც 3 დღის წინ კორპუსის სადარბაზო ჩამოინგრა, მოქალაქეები ყვავილებით მიდიან. ადგილზე არიან 9 წლის დაღუპული ბავშვის, ანასტასიას კლასელები და მასწავლებლები.

„ჩვენ ონლაინ არ ვსწავლობდით, დასრებით სწავლა გვქონდა. ველოდებოდით ორ საათზე, მაგრამ 12:00 საათზე, გავიგეთ ამბავი, რომ ის სახლი ჩამოინგრა, სადაც ანასტასია ცხოვრობდა. ჯერ არ გვჯეროდა, მაგრამ ყველა, ვინც ახლოს იყო ანასტასიას მშობლებთან, ადგილზე მივიდა და არ ვიცი, როგორ გავიარეთ ის დღე, როცა ინფორმაცია დადასტურდა. ჯოჯოხეთი იყო. ვუსამძიმრებ ყველა გარდაცვლილის ოჯახსა და მთლიანად საქართელოს. ეს უდიდესი ტრაგედიაა არა მხოლოდ იმ ოჯახებისთვის, არამედ - მთელი საქართველოსთვის“, - ამბობს ბავშვის მასწავლებელი თამილა შარაბიძე.

9 წლის გოგო სახლში მცირეწლოვან ძმასთან და დედასთან ერთად იყო, როცა კორპუსის სადარბაზო ჩამოინგრა. ოჯახის სამივე წევრი შემთხვევას ემსხვერპლა.

ბათუმში, 26 მაისის ქუჩაზე, 13 ნომერი კორპუსის ერთი სადარბაზო 8 ოქტომბერს, დაახლოებით, 12:00 საათზე ჩამოინგრა. სამაშველო ოპერაციის შედეგად, მაშველებმა ნანგრევებიდან 10 ადამიანის ამოყვანა შეძლეს, რომელთაგან 8 უკვე გარდაცვლილი იყო, ერთი ადამიანი გუშინ დილით, საავადმყოფოში გარდაიცვალა. ერთი ადამიანი ამ დრომდე ექიმების მეთვალყურეობის ქვეშ რჩება - ზვიად თავდგირიძე ერთადერთია, რომელიც ნგრევის დროს კორპუსში იყო და გადარჩა. ის ხელოვნური ვენტილაციიდან მოიხსნა და დადებითი დინამიკა აქვს.

საცხოვრებელი კორპუსის ნგრევის ფაქტზე მიმდინარე გამოძიების ფარგლებში 3 ადამიანი დააკავეს. გამოძიება საქართველოს სსკ-ის 240-ე მუხლის მე-2 ნაწილით და 187-ე მუხლის მე-3 ნაწილით მიმდინარეობს. დანაშაულები 2-დან 10 წლამდე ვადით თავისუფლების აღკვეთას ითვალისწინებს.

პრემიერ-მინისტრ ირაკლი ღარიბაშვილის ინიციატივით, დაღუპულთა ხსოვნის პატივსაცემად, ორშაბათი, 11 ოქტომბერი გლოვის დღედ გამოცხადდება.