სამთავრობო პროგრამის შესრულების ანგარიში: 2022 წლისთვის მეცნიერებისა და სამეცნიერო კვლევების ხელშეწყობაზე სახელმწიფო ბიუჯეტით განსაზღვრული დაფინანსება გაიზარდა

2022 წლისთვის მეცნიერებისა და სამეცნიერო კვლევების ხელშეწყობაზე სახელმწიფო ბიუჯეტით განსაზღვრული დაფინანსება გაიზარდა, - ამის შესახებ ნათქვამია სამთავრობო პროგრამის შესრულების შესახებ ანგარიშში. ანგარიშში წერია, რომ კანონმდებლობით დადგენილ პირობათა დაცვით გაიზარდა სსიპ − სამეცნიერო-კვლევითი დაწესებულებების სამეცნიერო პერსონალის შრომის ანაზღაურება.

„მსოფლიო ბანკის დაფინანსებით 2021 წელს განხორციელდა პროექტი − „უმაღლესი განათლების დაფინანსების ახალი მოდელის შემუშავება“, რომლის მესამე კომპონენტის ფარგლებში შედეგზე ორიენტირებული დაფინანსების ძირითად ინდიკატორებად კვლევების მიმართულებით განისაზღვრა სამეცნიერო პროდუქტიულობა (სამეცნიერო პუბლიკაციები საერთაშორისო ჟურნალებში, წამყვან ადგილობრივ და სხვა გამოცემებში, პატენტების რაოდენობა; სამეცნიერო (საერთაშორისო და ეროვნული) და გრანტების რაოდენობა. საქართველოს განათლებისა და მეცნიერების მინისტრის 2021 წლის 29 დეკემბრის №1435198 ბრძანებით, პროგრამის − „ევროკავშირის კვლევისა და ინოვაციის ჩარჩო პროგრამაში „ჰორიზონტი ევროპა“ საქართველოს მეცნიერთა ჩართულობის ხელშეწყობა“ − ფარგლებში ჩამოყალიბებულია მეცნიერების მენეჯმენტის სკოლა, რომელიც ასევე მხარდაჭერილია ევროკავშირის Twinning-ის პროექტის მიერ − „ინტერსექტორული თანამშრომლობის შესაძლებლობების მხარდაჭერა კვლევასა და ინდუსტრიას შორის“. საქართველოს მთავრობა აქტიურად მუშაობდა COST-ის ასოციაციაში საქართველოს გაწევრიანების მიმართულებით. 2022 წლის 14 თებერვალს გაკეთდება ასოციაციაში საქართველოს გაწევრიანების შესახებ შესაბამისი განაცხადი. შედეგად, 30-31 მარტს, პარიზში, უმაღლეს ხელმძღვანელთა კომიტეტისა და გენერალური ასამბლეის სხდომაზე COST-ის წევრი სახელმწიფოების წარმომადგენლებმა ერთხმად დაუჭირეს მხარი საქართველოს გაწევრიანებას. მეცნიერებისა და ტექნოლოგიების ევროპული ასოციაცია COST-ის სრულუფლებიანი წევრი სახელმწიფოს სტატუსი საქართველოს სამეცნიერო სფეროს წარმომადგენლებს საშუალებას აძლევთ, გააფართოონ და გააძლიერონ საერთაშორისო სამეცნიერო კავშირები და უზრუნველყონ თავიანთი კვლევითი პროექტების საერთაშორისო წარმატება, ასევე ჩაერთონ ორგანიზაციის სტრატეგიული მომავლის ფორმირების პროცესშიც. კვლევითი საქმიანობის ხარისხის ამაღლების მიზნით, 2022 წელს, შოთა რუსთაველის საქართველოს ეროვნული სამეცნიერო ფონდის ბაზაზე მიმდინარეობს მეცნიერმზომელობის არსებული ინსტრუმენტებისა და კვლევის ხარისხის მექანიზმების დახვეწა-განახლება ეროვნულ დონეზე. საქართველო-ევროკავშირს შორის „ერთი მხრივ, საქართველოსა და მეორე მხრივ, ევროკავშირს შორის ევროკავშირის კვლევისა და ინოვაციის ჩარჩო პროგრამაში „ჰორიზონტი ევროპა“ საქართველოს მონაწილეობის შესახებ“ საერთაშორისო შეთანხმებას ბრიუსელში 7 დეკემბერს საზეიმოდ მოეწერა ხელი. შეთანხმების გაფორმებით, საქართველოს სამეცნიერო და ინოვაციების სფეროს საზოგადოებას ახალი შესაძლებლობებისკენ გაეხსნა გზა. Horizon Europe-ის პროგრამის კონკურსებში საქართველოს წარმომადგენლები სარგებლობენ ზუსტად იმავე პირობებითა და უფლებებით, რითაც ევროკავშირის ქვეყნების სამეცნიერო და ინოვაციების სფეროს წარმომადგენლები სარგებლობენ. ქართველ მეცნიერებს შეუძლიათ, მონაწილეობა მიიღონ 95.5 მილიარდი ევროს ბიუჯეტის მქონე კვლევისა და ინოვაციის პროგრამის ფარგლებში გამოცხადებულ კონკურსებში. დაფუძნდა Horizon Europe-ის ეროვნული ოფისი, რომლის მისიაა ევროკავშირსა და საქართველოს უმაღლეს საგანმანათლებლო დაწესებულებებსა და კვლევით ინსტიტუტებს შორის მედიაციისა და კოორდინირებული მუშაობის უზრუნველყოფა. 14 უმაღლეს საგანმანათლებლო დაწესებულებაში უკვე გაიხსნა საუნივერსიტეტო საგრანტო ოფისები, რომლებიც მოქმედებენ ჰორიზონტი ევროპის ეროვნულ ოფისთან მჭიდრო თანამშრომლობით“, - ნათქვამია ანგარიშში.