ირაკლი რუხაძე: „იმედი“ არის დამოუკიდებელი და ალტერნატიული აზრების მატარებელი ქვეყანაში

ფანტასტიკურია, რომ ეს ტელევიზია არსებობს 20 წელია. ბადრი პატარკაციშვილმა შექმნა ეს ტელევიზია და მე ძალიან მიხარია, რომ ფაქტობრივად შექმნის პირველი დღიდან მეც რაღაც როლი მიმიძღვის ამ ტელევიზიის ცხოვრებაში. სულ ჩართული ვიყავი და ეს ჩემთვის დიდი სიამაყეა. 2018 წლიდან მე და ჩემი რამდენიმე პარტნიორი გავხდით ამ ტელევიზიის მფლობელები. უკვე სულ სხვანაირი პასუხისმგებლობა გადმოვიდა ჩვენს კისერზე, - ამის შესახებ „იმედის“ მფლობელმა, ირაკლი რუხაძემ ტელეკომპანიის იუბილესთან დაკავშირებით განაცხადა.

„ძალიან ცუდია, რომ ბადრი ამ დღეს ვერ მოესწრო. ძალიან ახალგაზრდა გარდაიცვალა, მაგრამ მგონი სიამაყით შეხედავდა ამ ტელევიზიას. მე ამის იმედი მაქვს, რადგან ბადრის იდეა იყო, რომ უნდა ყოფილიყო დამოუკიდებელი აზრი.

„იმედი“ უნდა ყოფილიყო განსხვავებული აზრების მატარებელი. დღესაც ვფიქრობ, რომ „იმედი“ არის დამოუკიდებელი და ალტერნატიული აზრების მატარებელი ქვეყანაში. ეს ძალიან მნიშვნელოვანია საქართველოს განვითარებისთვის. მინდა მადლობა გადავუხადო „იმედის“ ყველა თანამშრომელს, დღევანდელსაც და ყველას, ვინ 20 წლის განმავლობაში აქ მუშაობდა. ასევე მინდა მადლობა გადავუხადო ჩვენს მაყურებელს, რომელიც უკვე დიდი ხანია ახერხებს, რომ ჩვენ ვიყოთ ნომერ პირველი რეიტინგში. ვიყოთ უფრო დიდები, ვიდრე ჩვენი შემდგომი რამდენიმე კონკურენტი ერთად აღებული, რაც მე ძალიან მეამაყება და ამისთვის მინდა თქვენ მადლობა გადაგიხადოთ. 20 წლის შემდეგ „იმედი“ მინდა ვნახო ბევრად უკეთეს საქართველოში, ვინაიდან მიმაჩნია, რომ დღევანდელი საქართველო ბევრად უკეთესია, ბევრად უფრო განვითარებულია, ბევრად უფრო პლურალისტურია, ვიდრე იყო 20 წლის წინ“, - განაცხადა იარაკლი რუხაძემ.

15 მარტს „ტელეიმედი“ 20 წლის იუბილეს აღნიშნავს.