„იმედი“ დაბადებულია გამარჯვებისთვის, ამიტომ არც სანქციების, არც ტყვიების, არც სააკაშვილის პროკურორების და არც კონკრეტული „ენჯეოების“ სიყალბეზე აგებული პატაკის გვეშინია - ირაკლი ჩიხლაძის მონოლოგი

დღეს „იმედის“ დაბადების დღეა - თქვენი „იმედის“. ზუსტად 23 წლის წინ ქართველი ხალხის გულებში გაჩნდა უკეთესი ხვალინდელი დღის იმედი და ასეა დღემდე, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ.

მან ტელეკომპანიის არსებობის 23-წლიანი ისტორია შეაჯამა და „იმედის“ დღევანდელობასა და მომავალსაც შეეხო.

„წისქვილის ქვა არ დატრიალებულა ამ ორი ათეული წლის განმავლობაში ჩვენს თავზე - სხვა ყველაფერი გავიარეთ: საკუთარ თავზე, ოჯახებსა და მეგობრებზე. ყოველდღიურ პროფესიულ საქმიანობაში გამოვცადეთ ზეწოლის არნახული მასშტაბი, თავდასხმა თავისუფალ სიტყვაზე, დარბევა, ცემა, შანტაჟი, ღალატი და მაინც, განსაკუთრებული სიყვარული ქართველი ხალხის, მილიონობით ტელემაყურებლის მხარდაჭერა და თანადგომა. სწორედ ქართველი ხალხის განსაკუთრებული სიყვარულის წყალობით გადავრჩით და გავძლიერდით. არა მხოლოდ გადავრჩით, ყოველ ჯერზე, როცა უსამართლოდ გვექცევიან და ჩვენს დამორჩილებას და ჩვენში ცენზურის დაკანონებას ცდილობენ, უფრო და უფრო თავისუფლები და ძლიერები ვხდებით.

დიახ, უსაზღვრო გახდა ის ძალა, რომელსაც „იმედი“ ჰქვია და მაუწყებლობს საქართველოსთვის და ბრიტანული სანქციების გონივრულ ეჭვს თუ დავეყრდნობით, უკეთესი მსოფლიოსთვის.

აქ „იმედია“. „იმედი“ დაბადებულია გამარჯვებისთვის. ამიტომ არც სანქციების, არც ტყვიების, არც სააკაშვილის პროკურორების და არც კონკრეტული „ენჯეოების“ სიყალბეზე აგებული პატაკის გვეშინია - წერილებისა და მეილების, რომელთა წერას და ბრიუსელში გაგზავნას იმაზე უფრო დიდ დროს უთმობენ, ვიდრე ქვეყნისთვის რაიმე სასიკეთო საქმის გაკეთებას.

თუ ვინმე მკითხავს, ჩემთვის რას ნიშნავს „იმედი“ ეს არის მთელი ჩემი ცხოვრება, ჩემი ოჯახი, ჩემი მეგობრები, ჩემი მომავალი, ჩემი წარმატება და ბედნიერი ხვალინდელი დღე. ამ ლოგოს ქვეშ, თუნდაც ერთი სიტყვის თქმა პრივილეგიაა, პატივია.

„იმედი“ უდიდესი ძალაა. „იმედელები“ ვართ ამ ქვეყნის რიგითი ჯარისკაცები. აქ ღირსება და ადამიანობა განსაზღვრავს იმ ნდობას, წარმატებასა და რეიტინგს, რომელზეც არავის და არაფრის გამო ვიტყვით უარს. განსაკუთრებული მადლობა მის უდიდებულესობა - ტელემაყურებელს“, - განაცხადა ჩიხლაძემ.

23 წელი სატელევიზიო სივრცეში - „იმედი“ დღეს იუბილარია. ბადრი პატარკაციშვილის მიერ დაარსებული ტელევიზია პირდაპირ ეთერში პირველად 2003 წლის 15 მარტს გავიდა.