„პატრიარქო, გვიყვარხარ“ - საქართველომ კათოლიკოს-პატრიარქი ილია მეორე უკანასკნელ გზაზე გააცილა

საქართველომ კათოლიკოს-პატრიარქი უკანასკნელ გზაზე გააცილა - უწმინდესი და უნეტარესი ილია მეორე, მისი სურვილისამებრ, სიონის საპატრიარქო ტაძარში დაკრძალეს. უწმინდესი სიონის ტაძარში სამების ტაძრიდან მსვლელობით გადაასვენეს. პატრიარქი სასულიერო პირებმა, მრევლმა, ხელისუფლების წარმომადგენლებმა, საგანგებოდ ჩამოსულმა დელეგაციებმა, სხვადასხვა კონფესიის წარმომადგენლებმა, გზად მოწყობილ დერეფანში განლაგებულმა ჯარმა გააცილა.

მოქალაქეებს ასევე ჰქონდათ შესაძლებლობა, პროცესიისთვის ქუჩებში განთავსებულ ეკრანებზეც ედევნებინათ თვალი.

სრულიად საქართველოს კათოლიკოს-პატრიარქი სიონში ამბიონთან - წმინდა ნინოს ჯვარსა და ათონის ივერთა მონასტერში დაცული წმინდა ხატის ასლს შორის დაკრძალეს.

პატრიარქს სიონის ტაძართან შეკრებილი ათასობით ადამიანი შეძახილით: პატრიარქო, გვიყვარხარ!“ და ტაშით გამოემშვიდობა.

დაკრძალვამდე რამდენიმე წუთით ადრე სიონის ტაძარში ვიდეოგადაღება შეწყდა.

მანამდე სამების საკათედრო ტაძარში პატრიარქის წესის აგების მსახურება შესრულდა, რომელიც კონსტანტინოპოლის - ახალი რომის მთავარეპისკოპოსმა და მსოფლიო პატრიარქმა, ყოვლადუწმინდესმა ბართლომეოს I-მა, საპატრიარქო ტახტის მოსაყდრესთან, მიტროპოლიტ შიოსთან და საქართველოს ეკლესიის წმინდა სინოდის წევრებთან ერთად აღასრულა.

წესის აგების მსახურების შემდეგ საზოგადოებას სიტყვით მიმართეს და უწმინდესის ღვაწლზე ისაუბრეს საპატრიარქო ტახტის მოსაყდრემ მეუფე შიომ, მსოფლიო პატრიარქმა, ბართლომეოს პირველმა, საქართველოს პრეზიდენტმა მიხელ ყაველაშვილმა, პრემიერ-მინისტრმა ირაკლი კობახიძემ, პარლამენტის თავმჯდომარემ შალვა პაპუაშვილმა, პარტია „ქართული ოცნების“ დამფუძნებელმა და საპატიო თავმჯდომარემ ბიძინა ივანიშვილმა.

სამების საკათედრო ტაძარი პატრიარქის სამოქალაქო პანაშვიდისთვის 18 მარტის შემდეგ 24 საათის განმავლობაში ღია იყო. მისთვის პატივის მისაგებად მოქალაქეები უწყვეტ ნაკადად მიდიოდნენ. პატრიარქთან დასამშვიდობებლად მრევლი მთელი ქვეყნიდან ჩამოვიდა.

ილია მეორისთვის პატივის მისაგებად თბილისში არაერთი დელეგაცია ჩამოვიდა, მათ შორის მსოფლიო საპატრიარქოს, ასევე კათოლიკური ეკლესიის დელეგაციები. პატრიარქის ხსოვნას პატივი სხვადასხვა კონფესიის წარმომადგენლებმა, საქართველოში არსებული სხვადასხვა რელიგიური ორგანიზაციის წარმომადგენელმა სასულიერო ლიდერებმა მიაგეს.

სამების საკათედრო ტაძარში მგალობლები მთელი ქვეყნიდან იყვნენ შეკრებილნი და პანაშვიდის დღეებში უწყვეტად, 24 საათის განმავლობაში სრულდებოდა ქართული საგალობლები.

ილია მეორე საქართველოს კათოლიკოს-პატრიარქად 44 წლის ასაკში, 1977 წელს გამართულ მე-12 საეკლესიო კრებაზე აირჩიეს. მისი ინტრონიზაცია იმავე წლის 25 დეკემბერს სვეტიცხოველში შედგა.

ილია მეორე, ერისკაცობაში ირაკლი ღუდუშაური-შიოლაშვილი 1933 წლის 4 იანვარს ვლადიკავკაზში დაიბადა. 1960 წელს დაამთავრა მოსკოვის სასულიერო აკადემია.

1957 წელს ბერად აღიკვეცა და ილია ეწოდა; 1957 წლის 18 აპრილს სიონის საპატრიარქო ტაძარში ხელდასხმულ იქნა იეროდიაკვნად; 1959 წლის 10 მაისს წმინდა სერგის მონასტრის ლავრაში მღვდელმონაზვნად გამწესდა; სამშობლოში დაბრუნების შემდეგ დაინიშნა ბათუმის საკათედრო ტაძარში მღვდელმსახურად; 1961 წელის 19 დეკემბერს აღყვანილ იქნა იღუმენის, ხოლო 1961 წლის 16 სექტემბერს არქიმანდრიტის ხარისხში; 1963 წლის 26 აგვისტოს დაინიშნა კათოლიკოს-პატრიარქის ქორეპისკოპოსად; 1963-1972წწ. იყო მცხეთის სასულიერო სემინარიის პირველი რექტორი; 1967 წელს გადაყვანილ იქნა აფხაზეთის ეპარქიაში; 1969 წელს აღყვანილ იქნა მიტროპოლიტის ხარისხში; 1977 წლის 9 ნოემბერს დადგინდა პატრიარქის მოსაყდრედ; 1977 წლის 23 დეკემბერს არჩეულ იქნა სრულიად საქართველოს კათოლიკოს-პატრიარქად; 2010 წლის 21 დეკემბრის სინოდის სხდომის გადაწყვეტილებით საქართველოს კათოლიკოს პატრიარქის ტიტულატურა შემდეგნაირად განისაზღვრა: უწმინდესი და უნეტარესი ილია II, საქართველოს კათოლიკოს-პატრიარქი, მთავარეპისკოპოსი მცხეთა-თბილისისა და მიტროპოლიტი ბიჭვინთისა და ცხუმ-აფხაზეთის.

უწმინდესისა და უნეტარესის ლოცვა-კურთხევით თანამედროვე ქართულ ენაზე გამოიცა–ბიბლია, საღვთისმეტყველო კრებულები, ბროშურები, წიგნები, ჟურნალები, სამი სახის კალენდარი; დაარსდა გაზეთები; 1988 წელს უწმინდესისა და უნეტარესის თაოსნობით მცხეთის სასულიერო სემინარია გადმოტანილ იქნა თბილისში და დაარსდა თბილისის სასულიერო აკადემია-სემინარია; საქართველოს სხვადასხვა კუთხეში გაიხსნა სასულიერო სასწავლებლები: ბათუმში, ახალციხესა და ქუთაისში სასულიერო სემინარიები; ხულოში სასულიერო სასწავლებელი და მასთან არსებული გიმნაზია; საუკუნეთა შემდეგ კვლავ აღდგა გელათის სასულიერო აკადემია და ეკლესიის ეგიდის ქვეშ მყოფი გელათის მეცნიერებათა აკადემია;

ამ წლების განმავლობაში საქართველოს ეკლესიის ეპარქიათა რიცხვი 15-დან 33-მდე გაიზარდა; მონასტრებისა - 53-მდე; სასულიერო პირთა - 1000-მდე; აშენდა საქართველოში ყველაზე დიდი ეკლესიის - წმ. სამების სახელობის საკათედრო ტაძარი.

საქართველოს კათოლიკოს-პატრიარქი ილია მეორე 2026 წლის 17 მარტს 93 წლის ასაკში გარდაიცვალა.