ფიონჩანგში რუსი სპორტსმენები რუსეთის დროშის გამოფენას მხოლოდ საძინებლებში შეძლებენ

საერთაშორისო ოლიმპიურმა კომიტეტმა (IOC) შეიმუშავა ქცევის წესი, რომლის შესრულებაც რუსი სპორტსმენებისთვის, ფიონჩანგში ოლიმპიური თამაშების დროს, სავალდებულოა. 

ეს წესები მათ რუსეთის ჰიმნის საჯაროდ შესრულებას, გერბის და დროშის დემონსტრირებას უკრძალავს (მათ შორის მედიასა და სოციალურ ქსელებშიც). IOC აზუსტებს, რომ ერთადერთი ადგილი, სადაც “ოლიმპიელ ათლეტებს რუსეთიდან“ დროშის გამოფენა შეუძლიათ, მათი საძინებელი ოთახებია.

ამას გარდა, ამ წესების თანახმად, რუს სპორტსმენებს ფიონჩანგში მხოლოდ ოლიმპიური კომიტეტის მიერ ნებადართული ფორმის ჩაცმა შეეძლებათ. მათ ეკრძალებათ დაჯილდოების ალტერნატიულ ცერემონიებზე დასწრება, თუ ამის ორგანიზებას რუსეთის ოლიმპიური კომიტეტი, ან სხვა რომელიმე ორგანიზაცია შეეცდება.

ფიონჩანგში ზამთრის ოლიმპიადაზე 169 რუსი სპორტსმენი მიიღებს მონაწილეობას.

გასული წლის 5 დეკემბერს, ლოზანაში, საერთაშორისო ოლიმპიური კომიტეტის (IOC) აღმასრულებელი კომიტეტის საგანგებო სხდომაზე მიღებული გადაწყვეტილებით, რუსეთის ნაკრები, ვერ მიიღებს მონაწილეობას 2018 წლის ზამთრის ოლიმპიურ თამაშებში საკუთარი დროშით.

რუს სპორტსმენებს მხოლოდ ნეიტრალური ოლიმპიური დროშის ქვეშ ასპარეზობის უფლება აქვთ. კომიტეტმა დადასტურებულად მიიჩნია ის ფაქტი, რომ რუსეთში სახელმწიფოს დონეზე შექმნეს და ხელს უწყობდნენ დოპინგის მიღების სისტემას.

ცერემონიაზე აიკრძალა რუსული ჰიმნი, მის ნაცვლად დაუკრავენ ოლიმპიურ ჰიმნს. რუსებს ფორმებზე მიაწერენ: "ოლიმპიური სპორტსმენი რუსეთიდან". 

2018 წლის ზამთრის ოლიმპიური თამაშები 9-იდან 25 თებერვლამდე სამხრეთ კორეაში, ქალაქ ფიონჩანგში გაიმართება.