ვაინშტაინის ცოლი თავს მოტყუებულად და დამცირებულად გრძნობს

სექსუალურ შევიწროებაში ბრალდებული ჰოლივუდელი პროდიუსერის, ჰარვი ვაინშტეინის ცოლი აცხადებს, რომ ქმრის წესიერებაში ეჭვი არასდროს შეუტანია. ვრცელი ინტერვიუ ჯორჯინა ჩაპმანმა გამოცემა Vogue-ს მისცა.

„ალბათ, საშინლად გულუბრყვილო ვიყავი. მასში ეჭვი არასდროს შემპარვია. როდესაც სექსუალური სკანდალის შესახებ შევიტყვე, თავი ძალიან დამცირებულად ვიგრძენი. 5 თვე სახლიდან არ გამოვდიოდი. ჭრილობები ჯერ არ შემხორცებია. ახლახანს კიბეზე ავდიოდი და უცებ ვიგრძენი, თითქოს ფილტვებში ჰაერი აღარ მქონდა,“-განაცხადა ჩაპმანმა.

რამდენიმე დღის წინ ცნობილი გახდა, რომ Netflix-ის სერიალის "მარკო პოლოს" სერიალის პროდიუსერმა ვაინშტეინი გაუპატიურებაში, სექსუალურ შევიწროებაში და მუქარაში დაადანაშაულა.

მისი მტკიცებით, ის ცნობილი პროდიუსერისგან სხვადასხვა სახის ზეწოლას 5 წლის განმავლობაში ითმენდა. 

კანოსას თქმით, ვაინშტეინმა ის არაერთხელ შეავიწროვა, ხოლო მალაიზიაში ყოფნის დროს გააუპატიურა. 

ცნობილი გახდა, რომ ვაინშტეინის წინააღმდეგ სასამართლოში სარჩელი ჰოლივუდის მსახიობმა ეშლი ჯადმაც შეიტანა. ის ერთ-ერთია იმ ქალბატონებს შორის, რომელიც ჰოლივუდელ პროდიუსერს სექსუალურ შევიწროებაში ადანაშაულებს. 

2017 წელს ჰოლივუდში სექს-სკანდალი აგორდა, რომლის მთავარი გმირი პროდიუსერი ჰარვი ვაინშტეინი იყო. სკანდალური საქმის შესახებ მასალები თითქმის ერთდროულად გამოაქვეყნა ორმა წამყვანმა ამერიკულმა გამოცემამ - The New York Times-მა და The New Yorker-მა. 

პროდიუსერი ჯერ საკუთარი კომპანიიდან გააძევეს, შემდეგ ის ცოლმა მიატოვა,  ამერიკულმა და ბრიტანულმა პოლიციამ მის წინააღმდეგ გამოძიება დაიწყო. ამასთან, ის ბრიტანეთის და ამერიკის კინოაკადემიებიდან გარიცხეს.