ჯუანშერ ბურჭულაძე: ძლიერი ჯარი დგას ჩვენს ჯარისკაცებზე, მათ სიმამაცესა და პროფესიონალიზმზე

ნატოსთან დაახლოებისა და ინტეგრაციის პროცესის შეუქცევადობის მიზნით, გაგრძელდება მოქმედება მეტი ნატო საქართველოში და მეტი საქართველო ნატოში, ძლიერი ჯარი დგას ჩვენს ჯარისკაცებზე, მათ სიმამაცესა და პროფესიონალიზმზე- ამის შესახებ თავდაცვის მინისტრობის კანდიდატმა ჯუანშერ ბურჭულაძემ საკომიტეტო მოსმენაზე განაცხადა.

„ამ მიზნით გავაგრძელებთ ნატო-საქართველოს პაკეტის ეფექტურ აღსრულებას. 2020 წელს განახლდა დამტკიცებული პაკეტი, რომელიც მოიცავს 16 ახალ ინიციატივას, მათ შორის ორი - ლოჯისტიკური შესაძლებლობები და სტრატეგიული და ოპერატიული დაგეგმვა შევასრულეთ. წელს დაემატა სამი ახალი ინიციატივა. საქართველოს თავდაცვის უწყებაში შეიქმნა ახალი ქვესტრუქტურული ერთეული, რომელიც უზრუნველყოფს ნატოს სტანდარტებისა და კოდების მინიჭების ინიციატივას“, - განაცხადა ბურჭულაძემ.

მისი თქმით, ნატო-საქართველოს განახლებულ არსებითი პაკეტი თავდაცვის შესაძლებლობის განვითარებასა მდგარადობის გაძლიერებას, ნატოსთან თავსებადობის გაძლიერებასა და საქართველოს ალიანსში გაწევრიანებას უზრუნველყოფს.

„გაგრძელდება ჩვენი ძალისხმევა საერთაშორისო წვრთნების მასშტაბების გასაზრდელად, მსოფლიო მშვიდობის დასაცავად, როგორც ავღანეთში, ისე ევროკავშირის საერთაშორისო მისიებში. საქართველო მაქსიმალურად ცდილობს დააკმაყოფილოს ნატოს ფინანსური სტანდარტები. დარწმუნებული ვარ საქართველოს პრემიერ-მინისტრისა და გუნდის პირობებში ეს პოლიტიკა აუცილებლად განხორციელდება და ქვეყანა უზრუნველყოფს სამხედრო დანახარჯებს მთლიანი შიდა პროდუქტის 2%-ის ფარგლებში“, - აღნიშნა ბურჭულაძემ.

მისი თქმით, აშშ-სთან საქართველოს თანამშრომლობა სამაგალითოა და განსაკუთრებულ მადლიერებას იმსახურებს. „მადლობა მინდა გადავუხადო ჩვენს ამერიკელ მეგობრებს, აშშ-ის მხრიდან გაზრდილი სამხედრო დაფინანსებისთვის, ნატოში ინტეგრაციის გზაზე მხარდაჭერისა და ჩვენი ქვეყნის თავდაცვის უნარიანობის გაძლიერებისთვის. ცხადია ძლიერი ჯარი დგას ჩვენს ჯარისკაცებზე, მათ სიმამაცესა და პროფესიონალიზმზე“, - აღნიშნა ბურჭულაძემ.

გიორგი გახარიამ პრემიერ-მინისტრის თანამდებობა 18 თებერვალს დატოვა. „ქართულმა ოცნებამ“ პრემიერ-მინისტრობის კანდიდატად ირაკლი ღარიბაშვილი წარადგინა. 19 თებერვალს ირაკლი ღარიბაშვილმა მინისტრობის ახალი კანდიდატები დაასახელა.