ჯუანშერ ბურჭულაძემ თავდაცვის სამინისტროს პრიორიტეტული მიმართულებები დაასახელა

ჩვენი ეკონომიკის ზრდამ, პრემიერის ხელმძღვანელობით სწრაფად თამამი გადაწყვეტილებების მიღებამ მოგვცა იმის საშუალება, რომ მეტი შემოსავალი მიეღო ქვეყანას და შესაბამისად, გადანაწილებულიყო სხვადასხვა უწყებაზე, - ამის შესახებ საქართველოს თავდაცვის მინისტრმა, ჯუანშერ ბურჭულაძემ გადაცემაში „იმედი LIVE“ განაცხადა.

„ჯამში ჩვენ გვემატება 98 მილიონი ლარი, თუმცა ცდილობენ, რომ ეს პოზიტივიც ნეგატივად გადააკეთონ. ეს იქნება პროპორციულად გადანაწილებული ხარჯები. ჩვენი ძირითადი პრიორიტეტია სოციალური პირობების გაუმჯობესება ჩვენი სამხედროებისთვის. ზოგადად ეს მსოფლიო მასშტაბის ტენდენციაა, რადგან ბაზარი ძალიან კონკურენტუნარიანია. ეკონომიკის ზრდასთან ერთად, მოიმატა ხელფასებმა ქვეყანაში - ჩვენც ყველანაირად ვცდილობთ ტემპს ავყვეთ და არ ჩამოვრჩეთ. წელს უკვე ორჯერ მოემატათ ხელფასი დაბალი რგოლის სამხედრო მოსამსახურეებს. ეს ეხება ძირითადად რიგითებისა და კაპრალების შემადგენლობას. 20-დან 25%-მდე გავუზარდეთ ანაზღაურება დაბალი რგოლის სამხედრო მოსამსახურეებს. ასევე იანვარში დაგეგმილია 10%-ით ხელფასის გაზრდა ყველა სამხედროსთვის“, - აღნიშნა მინისტრმა.

ჯუანშერ ბურჭულაძის განცხადებით, თავდაცვის სამინისტროს დამატებითი ბიუჯეტი და ასიგნებებიც პროპორციულად მიმართული იქნება როგორც სამხედრო მოსამსახურის სოციალური პირობების გაუმჯობესებაზე, ასევე თავდაცვითი შესაძლებლობების გაუმჯობესებაზე.

თავდაცვის მინისტრმა უწყების პრიორიტეტებზეც ისაუბრა და აღნიშნა, რომ საქართველოში დაფუძნებული კომპანია ნატოს სტანდარტის ტიპის შაშხანებს აწარმოებს.

მან, ასევე, ყურადღება გაამახვილა პოლონელებთან ერთად დაფუძნებულ საწარმოზე, რომელიც დრონებზე იმუშავებს. ჯუანშერ ბურჭულაძემ განაცხადა, რომ ავიაციის აღდგენის პროცესი გაგრძელდება.

„მივყვებით ამბიციურ გეგმას, რაც დავისახეთ ჩვენს ავიაციაში. ყველა ეტაპი წინსწრებით გვაქვს განხორციელებული და ჩვენი ავიაციის აღდგენა გაგრძელდება", - განაცხადა მან.

ჯუანშერ ბურჭულაძემ განმარტა, რომ მანიპულირება, თითქოს, 18 მილიონით შემცირდა ავიაციის ხარჯები, სიმართლეს არ შეესაბამება.

თავდაცვის მინისტრის თქმით, თავდაცვის სამინისტროს ათწლიან გეგმაში ერთ-ერთ მთავარ პრიორიტეტად განსაზღვრულია საჰაერო თავდაცვა და ამ მიმართულებით არაერთი პროექტი ხორციელდება. ჯუანშერ ბურჭულაძემ აღნიშნა, რომ იგეგმება შესყიდვები, რაც კიდევ უფრო განავითარებს ამ მიმართულებას.

„ჩვენს პარტნიორებთან ერთად შევიმუშავეთ 10-წლიანი გეგმა, სადაც ერთ-ერთ მთავარ პრიორიტეტად განსაზღვრულია ჰაერსაწინააღმდეგო თავდაცვა. დაგეგმილია შესყიდვები, რომელსაც წელს დავიწყებთ“, - განაცხადა თავდაცვის მინისტრმა ჯუანშერ ბურჭულაძემ.