რა ახალი მოწყობილობები წარადგინა Google-მა კონფერენციაზე I/O?

7 მაისს Google-ის დეველოპერებისთვის კონფერენცია I/O დაიწყო. პირველ დღეს კომპანიამ გამართა პრეზენტაცია, რომელზეც ილაპარაკა Pixel 3-ის უფრო იაფი მოდელების, Android-ის ახალი ვერსიისა და თავის სხვა სერვისებში ცვლილებების შესახებ.

Pixel 3A და 3A XL

ეს კომპანიის ფლაგმანი ტელეფონების უფრო იაფი ვერსიებია - Google Pixel 3 (უფრო მცირე ზომისაა) და Pixel 3XL (უფრო დიდი ზომის).

სიახლე ის არის, რომ 3A-ს ფასები იწყება 399 დოლარიდან, ხოლო 3A XL-ის - 479 დოლარიდან. მათი წინა ვერსიები, შესაბამისად, დაახლოებით 799 და 899 დოლარი ღირს; მთავარია, რომ 3A-სა და 3A XL-ში დატოვეს ჩვეულებრივი Pixel 3-ის 12-მეგაპიქსელიანი კამერა. ის ბაზარზე საუკეთესოდ მიიჩნევა და შესანიშნავად იღებს სიბნელეშიც; კომპანიას უარის თქმა მოუწია წყალგამტარობასა და უსადენო დატენვაზე. მოწყობილობა სამ ფერშია ხელმისაწვდომი. ესენია: თეთრი, შავი და იისფერი. The Verge-ის ჟურნალისტებმა ტელეფონები გამოსცადეს და მათ 300-დან 500 დოლარამდე ღირებულების ტელეფონებში საუკეთესო არჩევანი უწოდეს.

Android Q-ს ახალი ბეტა-ვერსია

ეს Android-ის საოპერაციო სისტემის განახლებაა, რომელსაც ტელეფონებში, პლანშეტებში, ჭკვიან საათებსა და სხვა გაჯეტებში იყენებენ.

Android Q-ის ახალი ბეტა-ვერსიის მოწყობილობებზე ღამის რეჟიმი (თემა) ხელმისაწვდომი გახდა; გაჩნდა ახალი რეჟიმი სახელწოდებით Focus Mode. ის ზღუდავს ცალკეული აპლიკაციების მუშაობას, რომლებსაც შეუძლიათ მფლობელი სწავლის ან მუშაობის დროს მოაცდინონ; Smart Reply-ს ფუნქცია მომხმარებელს საშუალებას აძლევს შეტყობინებებს სწრაფად, თავად აპლიკაციების გაუხსნელად უპასუხოს. არის მზა პასუხებიც: „რა თქმა უნდა“, „არა, არ შემიძლია“. თუ შეტყობინებაში თანამოსაუბრე შეხვედრას გთავაზობთ და მისამართს ასახელებს, ეკრანზე გამოჩნდება Google-ის რუკის პიქტოგრამა, რომელშიც ტელეფონი სწორ მარშრუტზე უმალ მიგითითებთ; ახალი ბეტა-ვერსიის დაყენება უკვე შესაძლებელია; Android Q-ს სრულყოფილი რელიზი შემოდგომაზე იგეგმება.

Nest Hub Max

ეს Google-ის ჭკვიანი ეკრანია, რომელიც კომპანიის სხვა პროდუქტებსაც მოიცავს - სვეტს და სათვალთვალო კამერას.

10-დუიმიანი HD-ეკრანი, ჩაშენებული კამერა (შეიძლება ვიდეოზარების განხორციელება), სამი დინამიკი. მოწყობილობის გამოყენება სათვალთვალო კამერადაც შეიძლება - ამასთანავე,  გამოსახულება ტელეფონს გადაეცემა. კამერა ღილაკზე ხელის ერთი დაჭერით ითიშება; Nest Hub Max-ს სახეების ამოცნობა შეუძლია. მფლობელის მიახლოებისას მოწყობილობა მას საყვარელ ფოტოებს აჩვენებს ან გამოტოვებული ზარის შესახებ ატყობინებს. მოწყობილობა ორი ფერისაა - ნაცრისფერი და შავი. Nest Hub Max-ის ფასი 229 დოლარიდან იწყება. მას ივლისიდან გაყიდიან.

სხვა სიახლეები: ძიება, რუკები, Google Lens

- მალე Android-ი ეკრანზე სუბტიტრების ავტომატურად შექმნას და გამოტანას ისწავლის. ფუნქცია ამოქმედდება არა მხოლოდ YouTube-ის ვიდეორგოლებზე, არამედ პოდკასტებშიც (და ვიდეოზარებშიც კი).

- Google-ის საძიებო სისტემას დაემატება დამატებითი რეალობის ელემენტები. მაგალითად, „ზვიგენის“ მოთხოვნით გაჩნდება ზვიგენის 3D-მოდელი, რომლის დანახვაც ყველა მხრიდან იქნება შესაძლებელი. გარდა ამისა, საძიებო სისტემამ პოდკასტების ინდექსირება ისწავლა.

- Project Mainline - ეს განახლებების გამოშვების სისტემაა, რომლებიც საოპერაციო სისტემის უსაფრთხოების განმტკიცებისკენაა მიმართული. ახლა ისინი უმალ ხელმისაწვდომი იქნება Play Store-ზე. მანამდე მოწყობილობების შემქმნელები მათ თავად უშვებდნენ, რის გამოც ბევრი მომხმარებელი განახლებას დიდი დაგვიანებით იღებდა.

- Google-ის რუკებში გაჩნდება „ინკოგნიტო“ რეჟიმი. ადგილები, რომლებსაც მომხმარებელი ამ რეჟიმში მოძებნის, ექაუნთს არ მიებმება. ფუნქცია ხელმისაწვდომი იქნება აპლიკაციაში და რუკების ვებ-ვერსიებში.

- 2018 წელს, კომპანიამ წარადგინა ხმოვანი ასისტენტი Google Duplex-ი. ეს, ფაქტობრივად, ელექტრონული მდივანია, რომელსაც, მაგალითად, შეუძლია სალონში დარეკვა და მეპატრონის თმის შეჭრაზე ჩაწერა. ახლა ეს ყველაფერი ვებ-ვერსიაში იქნება ხელმისაწვდომი. ასევე, ასისტენტმა ისწავლა ინტერნეტ-გვერდების დამოუკიდებლად თვალიერება და კინოს ბილეთების დაჯავშნა (Duplex თავად შეავსებს ყველა საჭირო ველს).

- Google Lens-ის წყალობით, რომელიც კამერის აპლიკაციასა და ფოტოგალერეაში ჩააშენეს, მომხმარებელი შეძლებს ტელეფონის მიტანას მენიუსთან რესტორანში და ყველა შეთავაზებული კერძის ნახვას (ეკრანზე ამ კერძების ფოტოები და ვიდეო გაჩნდება). ასევე Google Lens-ს ბარში ან რესტორანში რამდენიმე ადამიანს შორის ანგარიშის განაწილება შეუძლია.

- პრეზენტაციის დაწყებამდე კომპანიამ განაცხადა, რომ მუშაობს დასაკეც-ეკრანიანი სმარტფონების შექმნაზე. თუმცა, ამ მხრივ, მკაფიო გეგმები Google-ს ჯერ არ აქვს.