Apple-მა რამდენიმე ტექნოლოგიური სიახლე წარადგინა

მსოფლიო დეველოპერების კონფერენციაზე (WWDC) Apple-მა თავისი მომხმარებლისთვის რამდენიმე სიახლე წარადგინა. ღონისძიების პირდაპირი ეთერისთვის თვალის დევნება მომხმარებელს კონცერნის ვებგვერდზე შეეძლო.

WWDC 2019-ზე Apple-ის გუნდმა iOS 13 წარადგინა. ახალ ოპერაციულ სისტემას „შავი ფონი“, ე.წ. Dark Mode-ი აქვს. ახალ ოპერაციულ სისტემაზე ხმოვან ასისტენტ Siri-ს ახალი ხმა ექნება.

ახალ iOS-ში გაუმჯობესებულია სმარტფონის მანევრირებაც, შესაბამისად თითქმის ორჯერ სწრაფად არის შესაძლებელი აპლიკაციის გახსნა. Face ID-ის ფუნქცია კი დაბლოკილ ეკრანს 30%-ით სწრაფად განბლოკავს. 

Apple-მა განაახლა კლავიატურაც. ბეჭდვისას შესაძლებელი გახდა ტექსტის აკრეფა თითის ეკრანიდან აუღებლად. განახლებამ მომხმარებელს საშუალება მისცა iPhone-იდან მუსიკა რამდენიმე უსადენო სპიკერზე და ყურსასმენზე გააზიაროს. 

მთლიანად განახლდა ე.წ. Reminders-ი, შეიცვალა მისი ვიზუალური მხარე და დაემატა ახალი ფილტრები. განახლება მიიღო Notes-მა, Safari-ის ბრაუზერმა, Apple Mail-მა და Apple Maps-მა. რუკას Google Maps-ის მსგავსი ქუჩის ხედის (Street view) ფუნქცია დაემატა. სიახლეა Find My აპლიკაციაშიც, რომელიც დაკარგულ მოწყობილობას იმ შემთხვევაშიც იპოვნის, თუ ის მიუწვდომელია. კონცერნმა iTunes-ზეც ილაპარაკა და მანამდეც თქვა, რომ MacOS 10.15-ზე მზადაა მასზე უარი თქვას. 

Apple-მა განაახლა ოპერაციული სისტემა Watch OS. ამიერიდან Apple-ის ჭკვიან საათს უკვე საკუთარი, აპლიკაციების მაღაზია აქვს. გაიმართა macOS 10.15-ის და tvOS 13-ის პრეზენტაციაც. ასევე შეიქმნა განცალკევებული ოპერაციული სისტემა iPads-ისთვის. 

კონცერნმა ღონისძიებაზე აჩვენა 28 ბირთვიანი პროცესორის მქონე Mac Pro 6K მონიტორით. 

გაირკვა ისიც, რომ პირადი უსაფრთხოების დასაცავად Apple-მა მომხმარებელს ახალი ინსტრუმენტი შესთავაზა. Apple-ი ამბობს, რომ დეველოპერები სხვადასხვა ვებგვერდებზე ან აპლიკაციაში მომხმარებელს Facebook-ის, Google-ის ან Twitter-ის ანგარიშით შესვლის ნებას აძლევენ, რითაც მათ ნდობას ბოროტად იყენებენ და პირად ინფორმაციას იპარავენ. კონცერნი ამბობს, რომ Apple-ის ახალი სისტემის მეშვეობით ეს აღარ მოხდება. სიახლით სარგებლობა, როგორც აპლიკაციებზე, ისე ვებგვერდებზეც იქნება შესაძლებელი. 

რა სიახლეები წარუდგინა Apple-მა მომხმარებელს WWDC 2018-ზე ამ ბმულზე წაიკითხეთ.