Apple-მა მომხმარებლებისთვის რამდენიმე სიახლე წარადგინა

WWDC 2018-ზე Apple-მა მისი მომხმარებლისთვის რამდენიმე სასიამოვნო სიახლე წარადგინა. მათ შორის ერთი ახალი ამბავი Apple CarPlay-ს ეხება. ამის შესახებ The Verge-ი წერს. 

ცნობილი ხდება, რომ Apple CarPlay მალე ახალ ფუნქციას დაიმატებს და განახლებული ვერსიის საშუალებით მომხმარებელი მასზე Google Maps-ს, Waze-ს და სხვა მსგავს სანავიგაციო აპლიკაციებს გამოიყენებს. 

ეს იმას ნიშნავს, რომ iOS 12-ის გამოსვლასთან ერთად, რომელიც მიმდინარე წელს გამოჩნდება Apple CarPlay-ზე მომხმარებელს მხოლოდ კონცერნის რუკის გამოყენება აღარ მოუწევს. 

მიუხედავად იმისა, რომ Apple Maps-ი რამდენჯერმე განახლდა მომხმარებლის სასურველი ნავიგაციის აპლიკაცია მაინც ვერ გახდა. მისი უზუსტობებიდან გამომდინარე მომხმარებელი ხშირად Google Maps-ს ან სხვა მსგავს სანავიგაციო აპლიკაციებს იყენებს ზუსტი კოორდინაციისთვის. 

iOS 12-ის გამოსვლასთან ერთად iPhone-ზე განახლდება ნოტიფიკაციებიც. საუბარია იმაზე, რომ მომხმარებელს საშუალება ექნება თავად აკონტროლოს როდის და რა სიხშირით მიიღებს მას. შეძლებს გარკვეული დროითაც შეზღუდოს ის. Apple-ში მიიჩნევენ, რომ ამ ფუნქციის ჩაშვებასთან ერთად გაჯეტის გამოყენება მომხმარებლისთვის ნაკლებად სტრესული იქნება. შეგახსენებთ, რომ ნოტიფიკაციების კონტროლის რეჟიმი Android-ს უკვე წლებია აქვს. 

პარალელურად ცნობილი ხდება, რომ მომხმარებლები შეძლებენ გააკონტროლონ დრო, რომელსაც სმარტფონის გამოყენებაზე ხარჯავენ და თითოეული აპლიკაციის შემთხვევაშიც კი შეზღუდვა გარკვეული დროით დააწესონ. 

განახლდა FaceTime-იც. ამიერიდან აპლიკაცია მომხმარებელს ნებას აძლევს 32-მა ადამიანმა ვიდეო კონფერენცია მოაწყოს. აქამდე მხოლოდ 2 ადამიანი ესაუბრეოდა ერთმანეთს. პარალელურად FaceTime-ი iOS 12-თან ერთად ტექსტურ შეტყობინებებში ინტეგრირდება, რაც საშუალებას მისცემს მომხმარებელს ჯგუფური ტექსტური მიმოწერა ვიდეო კონფერენციად გადააქციოს. 

რაც შეეხება Apple TV-ს, კომპანიის სეტ ტოპ ბოქსს Dolby Atmos რეჟიმი დაემატა. ეს იმას ნიშნავს, რომ Apple TV 4K ამჯერად ერთადერთი მოწყობილობაა, რომელსაც Dolby Atmos-ის და Dolby Vision-ის რეჟიმის მხარდაჭერა ერთდროულად აქვს. Apple-ის სეტ ტოპ ბოქსები სიახლეს მომხმარებელს შემოდგომიდან შესთავაზებს. 

პარალელურად ცნობილი ხდება იმის შესახებაც, რომ Apple-ის და NASA-ს პარტნიორობის საშუალებით Apple TV-ის მომხმარებლები კოსმოსური სადგურიდან პანორამულ გამოსახულებებს პირდაპირ რეჟიმში მიიღებენ. მის გამოყენებას კი ე.წ. Screensaver-ზე, ანუ დასვენების რეჟიმზე შეძლებენ. 

ცვილებები შეეხო MacOS-საც. დღევანდელ WWDC კონფერენციაზე Apple-მა განაცხადა, რომ MacOS-ს Mojave-ს Dark Mode ექნება. 

ამ სიახლესთან ერთად MacOS-ზე მალე გამოჩნდება ახალი Mac App Store-ი, რომელსაც Microsoft’s Office 365, Adobe’s Lightroom CC, Panic’s Transmit-ი და Bare Bones’ BBEdit-ი დაემატება. 

ერთ-ერთი ყველაზე სასიხარულო მომხმარებლისთვის ალბათ Animoji-ა. სწორედ დეველოპერების კონფერენციაზე (WWDC) გაჟღერდა, რომ მომხმარებელი საკუთარი გამოსახულებისგან ანიმაციას შექმნის, რომელსაც უკვე არა Animoji, არამედ Memoji-ს უწოდებენ. ეს სიახლეც, ისევე როგორც სხვა დანარჩენი iPhone-ებზე iOS 12-თან ერთად გამოჩნდება. 

პარალელურად ცნობილი ხდება, რომ Siri-ს ხმოვანი ასისტენტი მომხმარებლის ხმოვანი ბრძანებების ჩაწერასაც შეძლებს. iOS 12-თან ერთად კამერა 70%-ით, ხოლო კლავიატურა 50%-ით სწრაფი გახდება. 

ახალი iOS 12 შემოდგომაზე გამოვა და იმ მოწყობილობებზე განახლდება, რომელიც სულ მცირე 2013 წელს მაინც არის წარმოებული. 

შეგახსენებთ, რომ WWDC 2018 კონფერენციამ სტარტი 4 ივნისს აიღო. დეველოპერების მიერ დაანონსებულ სიახლეებს მთელი კვირის განმავლობაში, 8 ივნისის ჩათვლით უნდა ველოდოთ.