როგორ მოვძებნოთ ინტერნეტში წიგნი, რომლის სახელწოდებასაც ვერ ვიხსენებთ

ხშირად, ადამიანს დიდი ხნის წინ წაკითხული წიგნის გადაკითხვა უნდა, მაგრამ მის სახელწოდებას ვერ იხსენებს. აგვისტოს დასაწყისში ნიუ-იორკის საჯარო ბიბლიოთეკის თანამშრომლებმა ჰაკატონი მოაწყვეს და მსგავსი პრობლემის მქონე მკითხველების დახმარებას შეეცადნენ. ყდის აღწერა, დაახლოებითი სიუჟეტი ან პერსონაჟების სახლები - სულ ეს იყო რაც ბიბლიოთეკარებს გააჩნდათ. მიუხედავად ამისა, ორი საათის განმავლობაში მათ 48 წიგნი იპოვეს.

წიგნებს Google-ით მიაგნეს, რაც მარტივი, მაგრამ ეფექტიანი გზა აღმოჩნდა. ჰაკატონის მონაწილეებს საძიებო ველში შეჰყავდათ მათთვის ცნობილი ყველა შესაძლო მონაცემი და შემდეგ შედეგებს აკვირდებოდნენ. სავრაუდოდ, ეს გზა ყველა მკითხველს დაეხმარება. შეეცადეთ სასურველი წიგნის შესახებ გაიხსენოთ მაქსიმალურად ბევრი რამ, მაგალითად ჟანრი, ავტორის გვარი, რაიმე დასამახსოვრებელი ციტატა, ან ყდა. სცადეთ სხვადასხვა ვარიანტები - რაც უფრო მეტ მონაცემს მიაწვდით საძიებო სისტემას, მით უფრო დიდია წიგნის პოვნის შანსი. ამასთან „დაგუგლეთ“ სწორად.

არსებობს სხვა სერვისებიც. მაგალითად, Google Book Search-ის საშუალებით წიგნის მოძებნა საკვანძო სიტყვებით და ცალკეული სიტყვათა შეთანხმებებით შეიძლება. ერთი შეხედვით სერვისი „რთულად“ გამოიყურება, თუმცა მთლიანობაში ის თავის ამოცანას უმკლავდება. ენების შესარჩევ ველში ქართული ენა არ არის, თუმცა სერვისი ბევრი უცხოენოვანი წიგნის მოძებნაში დაგეხმარებათ. Google Book Search-ი ჟურნალებს და გაზეთებსაც პოულობს - შეიძლება მათი პუბლიკაციის პერიოდის მითითება.  

თუ ინგლისურ ენაზე დაწერილ წიგნს ეძებთ და Google Book Search-ში საკვანძო სიტყვების მითითებით ვერაფერს გახდით, მიმართეთ ფორუმებს ან თემატურ ჯგუფებს. დაიწყეთ აქედან: Reddit; Goodreads; LibraryThing. მოთხოვნა მაქსიმალურად მკაფიოდ ჩამოაყალიბეთ. თუ ინგლისურად წერა კარგად არ გეხერხებათ, სთხოვეთ მას ვისაც ეს შეუძლია. შეცდომები თავისთავად პრობლემა არ არის, თუმცა მათ ძიების პროცესი შეიძლება გაართულონ. 

თუ საძიებო სისტემები და სერვისები ვერ გეხმარებათ, ფორუმებით და სოციალური ქსელებით ისარგებლეთ. ჰკითხეთ მეგობრებს და გამომწერებს რა წიგნს ეძებთ და დაგეხმარებიან.

რაც შეეხება ქართულ წიგნებს ან ქართულ თარგმანებს, ინტერნეტი ამ მხრივ მდიდარი არ არის. მაგრამ ფასიანთან ერთად უფასო რესურსებიც არსებობს, რომელთა ნახვაც რამდენიმე ბმულზე შეიძლება: elibrary.sou.edu.ge, 4love.ge, lit.ge, saba.com.ge