„ღამის მგლების“ მოქმედებას თბილისში პოლიცია გააკონტროლებს

თბილისში 9 მაისის აღსანიშნავ ღონისძიებებზე რუსული მოტოკლუბის „ღამის მგლები“ მონაწილეობას სამართალდამცველები გააკონტროლებენ და თუ ისინი საქართველოს სუვერენულ ინტერესებს შელახავენ, პოლიცია ადეკვატურ ზომებს მიიღებს. ინფორმაციას pia.ge ავრცელებს. ამის შესახებ, სააგენტოს საქართველოს შინაგან საქმეთა მინისტრის მოადგილემ, შალვა ხუციშვილმა განუცხადა. 

თბილისში, კრემლთან დაახლოებული რუსი ბაიკერები მეორე მსოფლიო ომის დამთავრებიდან 72–ე წლისთავის აღსანიშნავ ღონისძიებებში მიიღებენ მონაწილეობას. როგორც ხუციშვილმა განმარტა, აღნიშნულ საკითხზე სამინისტროსთან შექმნილი სპეციალური კომისია იმუშავებს.

„ღამის მგლები“ თბილისში, 9 მაისის აღსანიშნავად, 2015 წელსაც იმყოფებოდნენ. მაშინ მათ არაერთი უსიამოვნება მოუვიდათ ადგილობრივებთან გეორგიევსკის ლენტების გამო, რომელიც რუსული არმიის სიმბოლოს წარმოადგენს. „ღამის მგლები“ მაინც მივიდნენ გამარჯვების პარკში, თუმცა, ამის გაკეთება რუსული არმიის სიმბოლიკის გარეშე მოუწიათ.