9 აპრილის შესახებ ივანიშვილის წერილს პოლიტიკური შეფასებები მოჰყვა

პარტია "ქართული ოცნება - დემოკრატიული საქართველოს" თავმჯდომარის ბიძინა ივანიშვილის მიერ 9 აპრილის 30 წლისთავთან დაკავშირებით გავრცელებულ ღია წერილს მმართველი გუნდი და ოპოზიცია აფასებს. წერილს ოპოზიციის მხრიდან კრიტიკული განცხადებები მოჰყვა.

პარლამენტის ვიცესპიკერის გია ვოლსკის შეფასებით კი, ივანიშვილის წერილი საქართველოს უახლესი ისტორიის მნიშვნელოვანი პერიოდის შეფასებაა. 

"რასაკვირველია, ჩვენს პოლიტიკურ ოპონენტებს შეიძლება განსხვავებული მოსაზრებები ჰქონდეთ, მაგრამ ფაქტია, რომ ემოციაზე დაყრდნობით ძალიან ბევრი გადაწყვეტილებაა მიღებული. რეალურად, პოლიტიკურ ბრძოლას მნიშვნელოვანწილად შეეწირა ეროვნული ინტერესები მაშინ, როცა გაერთიანება გვმართებდა. სწორედ ამაზე წერს ბიძინა ივანიშვილი", - თქვა გია ვოლსკიმ.

საპარლამენტო უმრავლესობის ლიდერის არჩილ თალაკვაძის თქმით კი, წერილში გზავნილი მკაფიოდ არის მოცემული. მისი შეფასებით, ივანიშვილის ამ წერილზე გაკეთებული შეფასებები იქნება ლუსტრაცია, თუ "ვის ეხება წერილი სამშობლოს სიყვარულისა და დაპირისპირების ნაწილში".

წერილს ყატარიდან გამოეხმაურა პარლამენტის თავმჯდომარე ირაკლი კობახიძეც. მისი განცხადებით, წერილი ერთიანობისა და ერთსულოვნების სულისკვეთებით არის დაწერილი. "9 აპრილი არის მოვლენა, რომელიც ჩვენ შეგვახსენებს ერთიანობის და ერთსულოვნების მნიშვნელობას. არასდროს ისეთი ერთიანი და ერთსულოვანი არ ყოფილა ქართველი ხალხი, როგორც 9 აპრილს და 9 აპრილის შემდეგ", - თქვა ირაკლი კობახიძემ.

წერილს ოპოზიციის მხრიდან კრიტიკული განცხადებები მოჰყვა. "ნაციონალური მოძრაობის" წევრის, რომან გოცირიძის თქმით, ბიძინა ივანიშვილის ეს წერილი ისტორიის დამახინჯებული შეფასებაა: "უნდა განსაზღვროს ყველამ, სად იდგა ცხრა აპრილს - დამოუკიდებლობის მხარეს იდგა თუ რუსეთის მხარეს. საქართველოს მხარეს იდგა, როგორც თუნდაც მე ვიდექი თუ რუსეთში ბირჟაზე", - თქვა გოცირიძემ.

წერილს გამოეხმაურა "ევროპული საქართველოც". დეპუტატმა ზურაბ ჭიაბერაშვილმა ივანიშვილის ეს წერილი შუალედურ არჩევნებს დაუკავშირა. ჭიაბერაშვილის თქმით, ბიძინა ივანიშვილი რუსეთში 9 აპრილის „გმირებს“ ეხმარებოდა. "გენერალ ლებედს ეხმარებოდა საარჩევნო კამპანიის დროს. ამიტომ ეს ფარისევლობა, რასაც ბიძინა ივანიშვილი მუდმივად აკეთებს და ამ შემთხვევაში, 9 აპრილთან დაკავშირებით, უკვე ნათელია ჩვენი საზოგადოებისთვის", - თქვა ჭიაბერაშვილმა.

ბიძინა ივანიშვილმა 9 აპრილის მოვლენებიდან 30-ე წლისთავთან დაკავშირებით ღია წერილი გამოაქვეყნა. ივანიშვილი ქვეყნის ისტორიაში ამ თარიღის მნიშვნელობაზე ამახვილებს ყურადღებას და წერს, რომ "ქართული ოცნების" ხელისუფლებაში მოსვლას წინ სწორედ 9 აპრილის სულისკვეთება უძღვოდა და შედეგად მეშვიდე წელია, ქვეყანას რაციონალიზმზე დაფუძნებული პოლიტიკა მართავს. ამ ფონზე კი „ქაოსის მსურველი ძალები დამკვიდრებული დემოკრატიული ინსტრუმენტებით სარგელობენ და ეკონომიკურ პრობლემებზე სპეკულირებით კვლავ რევანშზე ფიქრობენ, ივანიშვილი მიიჩვნევს, რომ წარსულში მიბრუნება წარმოუდგენელია და წინ მხოლოდ რაციონალური პოლიტიკის, განვითარებისა და დემოკრატიის გზაა. ფიქრობს, რომ პოლიტიკური წარსულის მიუხედავად მოქალაქეები ისევ ერთი მიზნისთვის უნდა გაერთიანდნენ. მისი განმარტებით ეს მეხსიერების წაშლას, ვინმესთვის დანაშაულის მიტევებას არ ნიშნავს, მაგრამ პრინციპულობის ლოზუნგით საზოგადოების გახლეჩვა და პოლიტიკური წარსულის მუდმივი შეხსენება უნდა დასრულდეს.