გიორგი ქობულიამ ის საკითხები ჩამოთვალა, რაშიც მთავრობას არ ეთანხმება და პრობლემებს ხედავს

უკვე ერთი საათია პარლამენტში ეკონომიკის ყოფილ მინისტრს უსმენენ. მიუხედავად იმისა, რომ წინასწარ ითქვა, შეხვედრას უმრავლესობა არ დაესწრებოდა, შეხვედრაზე მაინც მივიდა "ქართული ოცნების" რამდენიმე დეპუტატი ზაზა ხუციშვილი, შოთა შალელაშვილი და ბიძინა გეგიძე.

გიორგი ქობულიამ თავდაპირველად მისი ხედვები გააცნო კანონმდებლებს, შემდეგ კი იმ მიმართულებებზე ილაპარაკა, რაშიც მთავრობას არ ეთანხმება და პრობლემებს ხედავს. გიორგი ქობულიას განცხადებით, მთავრობაში გადაწყვეტილებებს დაგვიანებით და ხშირ შემთხვევაში ემოციურად და გაუაზრებლად იღებენ. ყოფილი მინისტრის თქმით, საქართველოს მთავრობას არ გააჩნია ინვესტორთა მოზიდვის ერთიანი ხედვა, ეს მაშინ, როდესაც მისი შეფასებით, უცხოელი მსხვილი ინვესტორები ქართული ეკონომიკისთვის სასიცოცხლოდ მნიშვნელოვანია. 

გიორგი ქობულიას განცხადებით, საპარტნიორო ფონდის სტრატეგია და მუშაობის პრინციპები არ არის ჩამოყალიბებული და შედეგიანობა საკმაოდ დაბალია. 

ქობულიამ განაცხადა, რომ გასაძლიერებელია მიდგომა ჰესების და ქარის პროექტების მიმართულებით. მისივე თქმით, წლების განმავლობაში გაზის სექტორში საქართველოს გაზის ერთი მომწოდებელი ჰყავს და ეს სექტორი დარეგულირებული არ არის. ყოფილი მინისტრის განცხადებით, აზერბაიჯანი საქართველოსთვის "აბსოლუტურად ბუნებრივი პარტნიორია გაზის მოხმარებაში:

"ყველაფერზე რომ კითხვები გვიჩნდება, ასეთი კითხვა არავის გასჩენია, რომ წლების განმავლობაში ამ მთავრობის და იმ მთავრობის პერიოდშიც, ერთი კომპანიაა და რა ფასშიც უნდა იმ ფასში მიაწვდის. კომერციულ სექტორს სხვა გამოსავალი, რომ სხვა კომპანიისგან იყიდოს გაზი, არ აქვს. ეს საკითხი მოსაგვარებელია, ან უნდა შეიქმნას კონკურენცია, ან თუ ეს მონოპოლიაა, მაშინ უნდა დარეგულირდეს. დაურეგულირებელი მონოპოლია მე მგონი არ არის კარგი საქმე", - თქვა ყოფილმა მინისტრმა.

გიორგი ქობულიამ ყურადღება გაამახვილა ასევე საჯარო სტრუქტურებში კვალიფიციური კადრების დეფიციტზე და თქვა, რომ ამ მხრივ სახელმწიფო უწყებები კერძო სექტორს კონკურენციას ვერ უწევენ.

ქობულიამ ასევე ისაუბრა მარაბდა-კარწახის რკინიგზის მონაკვეთის შესახებ, რომელზეც თქვა, რომ "რატომღაც წლების განმავლობაში ამ მონაკვეთის დასრულების საკითხი არ წყდება". 

ეკონომიკის ყოფილმა მინისტრმა გიორგი ქობულიამ თანამდებობიდან გადადგომის მიზეზებზე გადაცემა „ფორბსის კვირაში“ პირველად ისაუბრა. მისი თქმით, სიმართლეა გავრცელებული ინფორმაცია, რომ გადადგომის  შესახებ განცხადების დაწერა სთხოვეს. 

ეკონომიკის მინისტრმა გიორგი ქობულიამ თანამდებობა პრემიერმინისტრის ბრძანებით დატოვა. ის თანამდებობიდან 2019 წლის 18 აპრილს გადადგა. ეკონომიკის მინისტრად ნათია თურნავა დაინიშნა.  

„თუ რომელიმე მინისტრი იმ ტემპს ჩამორჩება, რაც აუცილებელია იმისთვის, რომ შეპირებული შედეგი ვაჩვენოთ, ბუნებრივია ცვლილება არ დააყოვნებს“, - განაცხადა საქართველოს პრემიერმინისტრმა მამუკა ბახტაძემ. 

გიორგი ქობულია ეკონომიკის მინისტრად 2018 წლის 12 ივლისს დაინიშნა, მანამდე კი ბიზნესის სფეროში საქმიანობდა. გიორგი ქობულია ეკონომიკის მინისტრის თანამდებობას ათი თვის განმავლობაში იკავებდა.