საქართველო ჩრდილოატლანტიკურ საბჭოს უმასპინძლებს

ქრონიკის ექსკლუზიური ინფორმაციით, ოქტომბერში საქართველოს ჩრდილოატლანტიკური საბჭო ეწვევა. 

თბილისში ნატოს 29 წევრი სახელმწიფოს მუდმივი წარმომადგენლები ჩამოვლენ. ინფორმაცია „ქრონიკის“ კორესპონდენტს კავკასიასა და ცენტრალურ აზიაში ნატოს გენერალური მდივნის სპეციალურმა წარმომადგენელმა ჯეიმს აპატურაიმ დაუდასტურა

ეს იქნება ჩრდილოატლანტიკური საბჭოს წარმომადგენელთა მეხუთე ვიზიტი საქართველოში. ორგანიზაციაში აცხადებენ, რომ დაგეგმილი ვიზიტი კიდევ ერთხელ მიუთითებს ნატოსა და საქართველოს შორის მჭიდრო თანამშრომლობასა და ურთიერთობების უპრეცედენტო დინამიკაზე.

საქართველო ოქტომბერში ჩრდილოატლანტიკური საბჭოდან ახალ მხარდამჭერ განცხადებებს, გადაწყვეტილებებს და გზავნილებს ელოდება.

„ჩრდილოატლანტიკური საბჭოს ვიზიტი საქართველოში ჩვენთვის ძალიან მნიშვნელოვანია. ვმუშაობთ საქართველოს ელჩთან აქტიურად, რომ გვქონდეს კონკრეტული შედეგები ჩრდილოატლანტიკური საბჭოს საქართველოში ვიზიტისთვის. ახლა ყველაზე მნიშვნელოვანია შავი ზღვის უსაფრთხოება. ახლახან, საგარეო საქმეთა მინისტრების შეხვედრაზე მიღებული გადაწყვეტილებების თანახმად, ნატო აცხადებს მზადყოფნას შავი ზღვის უსაფრთხოების საკითხებზე საქართველოსთან ურთიერთობები გააღრმავოს.

ეს მოიცავს ბევრ ელემენტს. ნატო დაეხმარება საქართველოს უკეთესი სურათი ჰქონდეს, თუ რა ხდება საჰაერო სივრცეში, სიღრმისეული და კიდევ უფრო ხშირი კონტაქტი  იქნება ნატოსა და საქართველოს შორის შავ ზღვაზე სიტუაციის შესასწავლად, დაგეგმილია ერთობლივი წვრთნები. ჩრდილოატლანტიკური საბჭოს ვიზიტს ძალიან დიდი მნიშვნელობა და დატვირთვა აქვს.

ნატოში ჩემი მუშაობის პერიოდში ჩრდილოატლანტიკური საბჭო არ წვევია ორგანიზაციის არც ერთ სხვა პარტნიორს იმაზე ხშირად, ვიდრე საქართველოს. ეს ბევრს ნიშნავს და დემონსტრირებაა იმ დამოკიდებულების, რაც საქართველოს მიმართ აქვს ნატოს. ეს ვიზიტი არის ნაწილი ჩვენი 2019 წლის დატვირთული დღის წესრიგის. იყო ნატოს გენერალური მდივნის ვიზიტი, საქართველოს ეწვია სამხედრო კომიტეტი, ჩატარდა ერთობლივი წვრნთები, საქართველოს ეწვევა ჩრდილოატლანტიკური საბჭოს - ეს არის ყველაზე მაღალი ნიშნული და მართლაც ნიშნავს, მეტ ნატოს საქართველოში.

პოლიტიკურ დონეზე ჩვენ მივაღწიეთ ძალიან მაღალ დონეს. ჩრდილოატლანტიკური საბჭოს ვიზიტიც ამის დასტურია და აქტიური თანამშრომლობის დადასტურებაა. ასევე, ეს არის სიგნალი, რომ დიახ, ჩვენ მაქსიმალურად ვართ ჩართულები და მეორეს მხრივ, მზად ვართ მივიღოთ გადაწყვეტილებები, რომლებიც კიდევ უფრო მეტად გააღრმავებს ამ ურთიერთობას. ეს ვიზიტი არის უმნიშვნელოვანესი, როგორც სიმბოლური, ასევე პრაქტიკული თვალსაზრისით“, - თქვა ჯეიმს აპატურაიმ „ქრონიკასთან“ ინტერვიუში. 

ნატოს გადაწყვეტილების მიმღებ ძირითად ორგანოს ჩრდილოატლანტიკური საბჭო წარმოადგენს. გადაწყვეტილების მისაღებად ჩრდილოატლანტიკური საბჭოს შეხვედრები სამ დონეზე იმართება: ელჩების დონეზე, მინისტრების დონეზე და სახელმწიფოს მეთაურების დონეზე - მათ შეხვედრას სამიტი ეწოდება.