თალაკვაძე: მზად ვართ მომდევნო პოლიტიკური კონსულტაციებისთვის

საქართველოს პარლამენტის თავმჯდომარემ არჩილ თალაკვაძემ დიპლომატიური კორპუსის მონაწილეობით ხელისუფლებისა და ოპოზიციის შეხვედრის დასრულების შემდეგ თქვა, რომ მმართველი გუნდი დისკუსიების გაგრძელებისთვის ისევ მზად არის.

თალაკვაძემ განაცხადა, რომ ეს ფორმატი არ იყო აქტივისტებისთვის, ეს იყო ფორმატი, რომელშიც პოლიტიკური პარტიები და საერთაშორისო პარტნიორები მონაწილეობდნენ.

„მზად ვართ, ოპოზიციას ნებისმიერი დრო მივცეთ პროტესტის გასაგრძელებლად, კანონმდებლობის ფაგლებში. ამით კონკრეტული შეთანხმების მიღწევა შეუძლებელი იქნება, პოლიტიკური შეთანხმების მიღწევა მხოლოდ პოლიტიკური ფორმატებში არის შესაძლებელი და ეს საერთაშორისო საზოგადოებამ დღესაც დაადასტურა თავის რეკომენდაციებში. ასე რომ, მომდევნო პოლიტიკური კონსულტაციებისთვის მზად ვართ, სადაც ალბათ უკვე სხვა საკითხებს განვიხილავთ“, - თქვა თალაკვაძემ. 

პარლამენტის თავმჯდომარემ კიდევ ერთხელ აღნიშნა, რომ „გერმანული მოდელი“ საქართველოს კონსტიტუციას არ შეესაბამება.

„მოდელი, რომელსაც ჩვენ მხარს ვუჭერდით ერთი წლის წინ საკონსტიტუციო რეფორმის ფარგლებში, „ქართულმა ოცნებამ“ მიიღო. რა თქმა უნდა, ჩვენ გვქონდა სურვილი, რომ შეცვლილიყო პროპორციული არჩევნების თარიღი ამჯერად 2024 წლიდან 2020 წლამდე. თუმცა ამ გადაწყვეტილებას ნებისმიერ დემოკრატიულ სახელმწიფოში საბოლოო ჯამში იღებს საქართველო პარლამენტი. ასეთი გადაწყვეტილება მიიღო პარლამენტმა. რა თქმა უნდა, ჩვენც გულდაწყვეტილი ვართ, რომ ეს გადასვლა ვერ მოხდა, თუმცა ყველამ უნდა მიიღოს, რომ ეს არის პარლამენტის გადაწყვეტილება და უნდა გავაგრძელოთ მოძრაობა. 

მისი თქმით, თარიღის შეცვლის გადაწყვეტილებაზე საკმარისი ხმები რომ ვერ მოგროვდა, ეს არ არის პოლიტიკური პროცესის შეწყვეტა და არ ნიშნავს, რომ ქვეყანა დემოკრატიულ განვითარებას ასრულებს .

„ჩვენ რასაც ვგეგმავთ, ეს არის, რომ მოვემზადოთ 2020 წლის არჩევნებისთვის, ჩვენ მას აუცილებლად დემოკრატიულად და გამჭვირვალედ ჩავატარებთ. გარკვეული პასუხისმგებლობა 2020 წლის არჩევნებზე ოპოზიციურმა პარტიებმაც უნდა აიღონ. თუ რა გაუმჯობესების შესაძლებლობა არის უკვე საკანონმდებლო დონეზე, იმიტომ, რომ დღეს კიდევ ერთხელ ვნახეთ, რომ „გერმანული მოდელი“ არ არის შესაბამისი საქართველოს კონსტიტუციასთან, ამაზე მომდევნო კონსულტაციებში შესაძლოა, ჩვენ კიდევ დავხარჯოთ დრო“, - განაცხადა არჩილ თალაკვაძემ.

დიპლომატიური კორპუსის ინიციატივით, „ქართული ოცნების“ და ოპოზიციურ პარტიებს შორის სასტუმრო „ბილტმორში“ გამართულ ექვსსაათიან შეხვედრაზე მთავარი განსახილველი საკითხი ე.წ. გერმანული მოდელი იყო. 

ხელისუფლების წარმომადგენლებმა შეხვედრის შემდეგ თქვეს, რომ გერმანული საარჩევნო მოდელი ანტიკონსტიტუციურია და ამ საკითხზე მომავალში დებატები ვეღარ გაიმართება, თუმცა პოლიტიკური კონსულტაციებისთვის ისევ მზად არიან. 

ოპოზიციის წარმომადგენლები კი ამბობენ, რომ ხელისუფლებამ ე.წ. გერმანული მოდელის კონსტიტუციურობის დადგენაში საერთაშორისო ორგანიზაციების ჩართვაზე უარი თქვა და ისინი აქციებს განაგრძობენ.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.