რომის პაპი ილია მეორეს აღსაყდრების იუბილეს ულოცავს

რომის პაპი ფრანცისკე სრულიად საქართველოს კათოლიკოს-პატრიარქს ილია მეორეს აღსაყდრების 40 წელს ულოცავს. რომის პაპის მილოცვა სვეტიცხოვლის ტაძარში პროტოპრესსვიტერმა, მამა გიორგი ზვიადაძემ წაიკითხა. ამის შესახებ 1tv წერს.

„მის უწმინდესობასა და უნეტარესობას, ილია მეორეს, სრულიად საქართველოს კათალიკოს-პატრიარქს, მცხეთა-მთიანეთის, ბიჭვინთისა და ცხუმ-აფხაზეთის მიტროპოლიტს.თქვენი, სრულიად საქარველოს კათალიკოს-პატრიარქად აღსაყდრების 40 წლის იუბილესთან დაკავშირებით, მოხარული ვარ, ძმური სიყვარულით გადმოგცეთ ჩემი მხურვალე მოლოცვა. ვუერთდები თქვენს უწმინდესობას, თქვენს ეკლესიასა და ძვირფას ქართველ ხალხს და მადლობას ვუძღვნი უფალს, რომელმაც უხვად მოჰმადლა თავისი ლოცვა-კურთხევა თქვენს პიროვნებას და იმ დიად საქმეს, რომელსაც 40 წლის მანძილზე ემსახურებით.ბიბლიის მიხედვით, 40 წელი ის დროა, რომლის განმავლობაშიც რჩეული ერი ღმერთმა უდაბნოში ატარა აღთქმული მიწის დასამკვიდრებლად. თქვენც, თქვენო უწმინდესობავ, ამ 40 წლის მანძილზე უდაბნოში ვლიდით და წინ მიუძღვოდით თქვენს ერს ათეიზმის ხრიოკ ტრამალზე, სანამ კვლავ არ აღმოცენდა და გაიფურჩქნა რწმენა უფლისა საქართველოს ოდითგანვე ღვთითკურთხეულ და ურიცხვ წამებულთა სისხლით გაჯერებულს, ათას ჭირვარამგამოვლილ ჯვრის ნიშით აღბეჭდილ და ქართველი ხალხისათვის დამახასიათებელი თამამი იმედებით გაცისკროვნებულ მიწაზე. ძვირფასო ძმაო, გულში ცოცხლად ვინახავ ხსოვნას თქვენი ქვეყნის სულიერების, ქრისტიანობისა და კულტურისა, რომლის გაცნობის და დაფასების საშუალება მომეცა ჩემი შარშანდელი ვიზიტის დროს. მადლობას ვუძღვნი უფალს ამ შესაძლებლობისთვის და იმისთვისაც, რომ მომმადლა წყალობა პირადად გამეცანით და წმინდა, ძმური ამბორით გადაგხვეოდით.მადლიერი ვარ უფლის იმ მღელვარებისა და სიხარულისთვის, რომელსაც ის შეხვედრა და თქვენი პიროვნება დღესაც აღძრავს ჩემში. შობის წინა დღეებში თქვენს 85 წლის იუბილესთან დაკავშირებით მსურს, ჩვენს საერთო მამას ვთხოვო, მოგმადლოთ ჯანმრთელობა, ნუგეში, სულიერი სიხარული და შინაგანი ძალა არ მოაკლოს თავისი უხვი წყალობა თქვენს ძვირფას მსახურებას და თქვენს სიცოცხლეს. განსაკუთრებით კი მსურს დაგარწმუნოთ, რომ საქართველოში კათოლიკურ ეკლესიასთან ერთად, გამუდმებით ვილოცებ თქვენი უწმინდესობისა და უნეტარესობისთვის. ვთხოვ, უფალს, რომ თქვენს გულში მეც მიმიჩინოს ადგილი და ვიმედოვნებ, რომ როგორც სვეტიცხოვლის საპატრიარქო ტაძარში დაუვიწყარი ვიზიტისას ითქვა, ლოცვა და სიყვარული შეგვაძლებინებს აღვასრულოთ ის, რაც უფალმა თავის მორწმუნეებს უსურვა მოციქულთან სიტყვის მეშვეობით, რათა ყოველნი ერთ იყვნენ. ვატიკანი, პაპი ფრანცისკე“, – ნათქვამია რომის პაპის წერილში.

მანამდე ილია მეორეს აღსაყდრებიდან 40 წელი პრეზიდენტმა გიორგი მარგევლაშვილმა, პრემიერმინისტრმა გიორგი კვირიკაშვილმა, პარლამენტის თავმჯომარე ირაკლი კობახიძემ,დიდი ბრიტანეთის დედოფალმა ელისაბედ მეორემ და საქართველოში ევროკავშირის ელჩმა იანოშ ჰერმანმაც მიულოცეს.

სრულიად საქართველოს კათოლიკოს-პატრიარქის აღსაყდრებიდან 40 წელი შესრულდა. 1977 წლის 25 დეკემბერს საქართველოს ეკლესიას სათავეში ილია მეორე ჩაუდგა. მაშინ 15 ეპარქია და 30-ზე მეტი მოქმედი ტაძარი იყო. დღეს 46 ეპარქია, პატრიარქის ჩათვლით 47 მღვდელმთავარი და 2 000-მდე მოქმედი ეკლესია-მონასტერია ქვეყანაში.