პიარსპეციალისტები ვაშაძის რუსი პიარკონსულტანტების მუშაობაში ქვეყნისთვის საფრთხეს ხედავენ

გრიგოლ ვაშაძე ოფიციალურად გაერთიანებული ოპოზიციის სახელით პრეზიდენტობის კანდიდატია. 17 ივლისიდან ნაციონალურმა მოძრაობამ საარჩევნო კამპანია, თავად კანდიდატმა კი შეცდომების დაშვება დაიწყო. 

ვაშაძის რუსულმა წამოცდენამ ("შტაბკვარწირა") საარჩევნო კამპანიის მთავარი ხაზი უნებლიეთ დააანონსა. კანდიდატს მაშინ შეეშალა, რადგან რუსულ ენაზე საუბარს მრავალწლიანი მუშაობის და რუსეთში ცხოვრების გამო მიეჩვია. თუმცა, რადგან რუსეთი ოკუპანტია და საქართველოს მტერი, რუსეთიდან ჩამოსული პიარსპეციალისტებისთვისაც ვაშაძის რუსული წამოცდენის ფონზე მთავარი ამოცანა კანდიდატის რუსულ კავშირებზე კითხვების გაქარწყლება გახდა.

პიარსტრატეგიების სპეციალისტები ფიქრობენ, რომ სალომე ზურაბიშვილის განცხადებები, ვაშაძის რუსი პიარტექნოლოგებისთვის "კარგი სამუშაო მასალა" გახდა. ამის შესახებ მათ "იმედის კვირასთან" ისაუბრეს.

პიარის სპეციალისტები ამბობენ, რომ საარჩევნო ხმების მოსაპოვებლად რუსეთის თემით სპეკულირება საქართველოს იმიჯს საგარეო ასპარეზზე აზიანებს. ამიტომ, ქვეყნის ინტერესებისთვის, ურთიერთბრალდებების ნაცვლად, რუსეთ-საქართველოს ომის თემაზე ორივე კანდიდატი  უნდა შეთანხმდეს და საკითხი ბრძოლის იარაღად აღარ იქცეს.

სტრატეგიული კომუნიკაციების, პიარისა და კომუნიკაციების სპეციალისტები საფრთხესაც ხედავენ, რადგან იციან პიარკონსულტანტების მუშაობის სპეციფიკა. მათ მიაჩნიათ, საქართველოში რუსეთიდან ჩამოსული პიარ-ჯგუფის შეგროვებული ინფორმაცია სამომავლოდ შესაძლოა, საქართველოს წინააღმდეგ იარაღად იქცეს. 

„ნაციონალური მოძრაობის“ საპრეზიდენტო კანდიდატის, გრიგოლ ვაშაძის წინასაარჩევნო კამპანია წარმოშობით ბელარუსმა პოლიტტექნოლოგმა ვიტალი შკლიაროვმა და რუსეთის მოქალაქეებმა წარმართეს. 7 კაციანი PR-ჯგუფი არჩევნების პირველი ტურის შედეგებს ვაშაძის შტაბში რუსული შეძახილებით ზეიმობდა. რუსეთის ყოფილი მოქალაქე გრიგოლ ვაშაძე და მისი პოლიტიკური ჯგუფი ამაში პრობლემას ვერ ხედავენ და ამტკიცებენ, რომ ოკუპანტი ქვეყნის პროექტს არა ისინი, არამედ მათი მთავარი ოპონენტი წარმოადგენს.