ინაშვილი დეპუტატებს: ბესელიას, გოგიჩაიშვილის, ჩემი და სხვების ბრძოლის შედეგია დღეს პარლამენტში რომ ხართ

პარლამენტის ვიცესპიკერი ირმა ინაშვილი იურიდიული კომიტეტის სხდომაზე სოფო კილაძისა და ეკა ბესელიას შორის გამართულ დიალოგს ეხმიანება. ინაშვილი დეპუტატებს ახსენებს, რომ სწორედ ბესელიას, გოგიჩაიშვილის, გეგიძის, მისი და სხვა ადამიანების ბრძოლის შედეგია, დღეს ისინი პარლამენტში არიან. 

ინაშვილის განცხადებით, ეკა ბესელია "ზოგიერთი დეპუტატის მხრიდან" ასეთ ტონალობას და დამოკიდებულებას არ იმსხურებს.

"დანარჩენ დეპუტატებს, სხვათა შორის, ამ დარბაზში მსხდომებსაც მინდა, შეგახსენოთ, რომ სწორედ ბესელიას, გოგიჩაიშვილის, ბიძინა გეგიძის, ჩემი და კიდევ სხვა ადამიანების ბრძოლის შედეგია, დღეს თქვენ პარლამენტში სხედხართ. საერთოდ იმ ღირებულებებზე რომ ვლაპარაკობთ, რასაც ჰქვია თავისუფლება, დემოკრატია, ადამიანის უფლებები და ა.შ", – განაცხადა ირმა ინაშვილმა.

მან კომიტეტის წევრებს უთხრა, რომ კომიტეტში "შიდა გადატრიალებაა", რომელსაც ინაშვილი უზენაესის მოსამართლეების კანდიდატებს უკვშირებს. 

დღეს ეკა ბესელიამ პარლამენტის იურიდიულ საკითხთა კომიტეტის თავმჯდომარის თანამდებობა დატოვა. მისი თქმით, ამ გადაწყვეტილებით გუშინ შეჩერდა პროცესი, რომელიც, მისი აზრით, საზიანო იყო და შეეხება უზენაესი სასამართლოს მოსამართლეების დანიშვნის "ნაჩქარევ და გაუმართლებელ პროცესს". ირაკლი კობახიძის თქმით, მისთვის გაუგებარია, რატომ დაუკავშირა ეკა ბესელიამ იურიდიულ საკითხთა კომიტეტის თავმჯდომარეობის თანამდებობიდან გადადგომა უზენაესი სასამართლოს მოსამართლეების საკითხს. 

ბესელიასთან ერთად თანამდებობა იურიდიული კომიტეტის თავმჯდომარის პირველმა მოადგილემ ვანო ზარდიაშვილმაც დატოვა.

24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

სიამ პოლიტიკურ და საზოგადოებრივ წრეებში კრიტიკა გამოიწვია. 26 დეკემბერს ცნობილი გახდა, რომ პარლამენტი უზენაესი სასამართლოს მოსამართლეების განწესების გადაწყვეტილებას მიმდინარე სესიაზე არ მიიღებს.