პროკურატურაში „რუსთავი 2“-ის ყოფილი ფინანსური დირექტორი გამოკითხეს

„რუსთავი 2“-ის ყოფილი ფინანსური დირექტორი პროკურატურაში მოწმის სტატუსით გამოიკითხა.

კახა დამენიამ უწყების დატოვების შემდეგ ჟურნალისტებს განუცხადა, რომ „რუსთავი 2“-ში ფინანსური დირექტორის პოზიციაზე 2015 წელს მუშაობდა და კითხვები სწორედ ამ პერიოდს ეხებოდა.

მისივე თქმით, გამოძიების ინტერესებიდან გამომდინარე გაუთქმელობის ხელწერილზე მოაწერინეს ხელი და საქმის დეტალებზე ვერ ისაუბრებს. 

„უმთავრესად, კითხვები ეხებოდა იმდროინდელ შემოსავლებს, ხარჯებზე ნაკლებად იყო კითხვები. სარეკლამო დროის გაყიდვაზე ჰქონდათ შეკითხვები და ასე შემდეგ. გაუთქმელობის პირობაზე მაქვს ხელი მოწერილი და დეტალებში ვერ შევალ, საკმაოდ ზოგადი კითხვები იყო შემოსავლებთან დაკავშირებით. რა მიზანი აქვთ, არ ვიცი-ფაქტია, საუბარია სარეკლამო საკითხებთან დაკავშირებულ გარკვეულ საკითხებზე“, - განაცხადა კახა დამენიამ.

პირველ აგვისტოს „რუსთავი2“-ის კონტრაქტორ „ინტერმედიას“ სათავო ოფისიდან პროკურორებმა დოკუმენტაცია წაიღეს და მისი შესწავლა დაიწყეს. საუბარია 2013 წლიდან დღემდე შესრულებულ ტრანზაქციებზე. იმავე საღამოს გენერალურ პროკურატურაში მიმდინარე გამოძიების ფარგლებში „ინტერმედიას“ დირექტორი ზურაბ იაშვილი დაკითხეს.

2 აგვისტოს კი მაგისტრატი მოსამართლის თანდასწრებით ტელეკომპანიის ყოფილი დირექტორი ნიკა გვარამია დაიკითხა. მისი თქმით, გამოძიების მთავარი ინტერესია, რატომ ფორმდებოდა სარეკლამო კონტრაქტები ამა თუ იმ თანხაზე.