ადვოკატი: მითითებები, რომ ნეკა დოროყაშვილზე ძალადობის საქმეში მტკიცებულებები არ არსებობს, სიმართლეს არ შეესაბამება

ამ კონკრეტული მტკიცებულებების შინაარსობრივ მხარეში ჩვენ შეგნებულად არ შევდივართ, არ ვსაუბრობთ და არ ვასაჯაროებთ ამ მტკიცებულებებს, ვინაიდან ჩვენ ვითვალისწინებთ ბავშვის ინტერესებს და ასევე გვსურს, თავიდან ავიცილოთ დაზარალებულებისთვის ზიანის თავიდან მიყენება, - ეს განცხადება ნიკოლოზ ბასილაშვილის ყოფილი მეუღლის, ნეკა დოროყაშვილის ადვოკატმა, დღეს გამართულ სპეციალურ პრესკონფერენციაზე გააკეთა.

საქმის უშუალო ადვოკატის, ანა თავხელიძის განცხადებით, პირველ რიგში, აქ საუბარი არაა ერთ კონკრეტულ ინციდენტსა და ძალადობის ერთ კონკრეტულ შემთხვევაზე. არამედ განგრძობად, სისტემატიურ ძალადობაზე, რომელიც სხვადასხვა დროსა და ადგილზე სხვაასხვა ადგილზე ხდებოდა. „ეს არის დამატებითი გამოძიების საგანი და ჩვენ მოლოდინი გვაქვს, რომ სახელმწიფო ეფექტურ გამოძიებას ჩაატარებს ამ მიმართულებით და შესაბამის სამართლებრივ შეფასებას მისცემს“, - განაცხადა ადვოკატმა.

მისი თქმით, მეორე მნიშვნელოვანი საკითხი, რაც დღეს განსჯადი თემაა საზოგადოებაში, ეს არის სისხლის სამართლის საქმეში არსებული მტკიცებულებები. „ჯერ კიდევ გამოძიების საწყის ეტაპზე საქმეში არის არაერთი მტკიცებულება, რომელსაც გადაწყვეტილების მიღების პროცესში დაეყრდნობა სასამართლო. საუბარია სხვა და სხვა მტკიცებულებებზე, მოწმეთა ჩვენებაზე, ვიდეო და აუდიო მასალაზე. საუბარია ექსპერტიზის დასკვნებსა და შეფასებებზე. გამოძიება გრძელდება ამ საქმეზე და ჩვენთან თანამშრომლობის შედეგად, არაერთ მტკიცებულებას მოიპოვებს“, - აღნიშნა ანა თავხელიძემ.

ოჯახში ძალადობის ბრალდებით დაკავებულმა ჩოგბურთელმა ნიკოლოზ ბასილაშვილმა საპატიმრო დატოვა.

მანამდე მოსამართლემ ნიკოლოზ ბასილაშვილს 100 000-ლარიანი გირაო შეუფარდა.

საქართველოს პროკურატურამ ყოფილი მეუღლის მიმართ განხორციელებული ძალადობის ფაქტზე ბასილაშვილს ბრალდება სისხლის სამართლის კოდექსის 126-ე პრიმა მუხლის მე-2 ნაწილის „ბ“ ქვეპუნქტით წარუდგინა, რაც არასრულწლოვნის თანდასწრებით მისივე ოჯახის წევრის მიმართ ძალადობას გულისხმობს.