ქუთაისში შესაძლოა მერის არჩევნებზე მეორე ტური ჩატარდეს

ცესკოს მონაცემებით, 5 თვითმმართველი ქალაქიდან 4-ში: თბილისში, რუსთავში, ფოთსა და ბათუმში „ქართული ოცნების“ მერობის კანდიდატი პირველივე ტურში იმარჯვებს, ხოლო ერთში - ქუთაისში, სავარაუდოდ, მეორე ტური გაიმართება.

თბილისის მერის არჩევნებში 51.54 %-ით „ქართული ოცნების“ კანდიდატი, კახა კალაძე ლიდერობს. მეორე ადგილზეა „ნაციონალური მოძრაობის“ მერობის კანდიდატი ზაალ უდუმაშვილი - 16.52%-ით. ამ დროისთვის 737 უბნიდან 570 უბნის შედეგებია დათვლილი. 

ცესკოს წინასწარი მონაცემებით, რუსთავში, სადაც 87 უბნიდან 82-ია დათვლილი, „ქართული ოცნების“ მერობის კანდიდატმა ირაკლი ტაბაღუამ ხმების 53.05% მიიღო, მეორე ადგილზეა „ნაციონალური მოძრაობის“ მერობის კანდიდატი ზურაბ მაისურაძე - 19.81%-ით.

ბათუმში 103 უბნიდან 102-ია დათვლილი, რომელთა მიხედვითაც, „ქართული ოცნების“ მერობის კანდიდატმა ლაშა კომახიძემ ამომრჩეველთა ხმების 55.67%, ხოლო „ნაციონალური მოძრაობის“ მერობის კანდიდატმა ლევან ანთაძემ - 24.19% მიიღო. 

ფოთში 32-დან დათვლილია 31 უბნის მონაცემები, რომლის თანახმადაც, „ქართული ოცნების“ მერობის კანდიდატს გოჩა კურდღელიამ 54.92%, ხოლო „ევროპული საქართველოს“ მერობის კანდიდატმა ვახტანგ დარცმელიძემ 13.49% მიიღო.

ქუთაისში, 124-დან 100 უბნის მონაცემებია დათვლილი, „ქართული ოცნების“ მერობის კანდიდატს გიორგი ჭიღვარიას 48,42% აქვს, ხოლო „ნაციონალური მოძრაობის“ მერობის კანდიდატს გრიგოლ ვაშაძეს კი - 27.25%. ამ მონაცემებით, ქუთაისში სავარაუდოდ, მერობის არჩევნების მეორე ტურია მოსალოდნელი, რადგან კანდიდატს მერის მანდატის მოსაპოვებლად 50%-იანი ბარიერის გადალახვა სჭირდება.

21 ოქტომბერს საქართველოში თვითმმართველობის არჩევნები ჩატარდა. ამ დღეს საქართველოს მოქალაქეებმა ქვეყნის მასშტაბით 64 საკრებულოს 2058 დეპუტატი და 64 მერი პირდაპირი წესით, 4 წლის ვადით აირჩიეს.