სიორიძის შტაბი: გიორგი როყვასთან დაკავშირებით ე.წ. სპექტაკლი კოტე შარაშენიძეს დასჭირდა

"ქართული ოცნება - დემოკრატიული საქართველოს" ოზურგეთის საარჩევნო შტაბი გიორგი როყვასთან დაკავშირებით დღის განმავლობაში მიმდინარე მოვლენების შესახებ განცხადებას ავრცელებს. ოცნების კანდიდატის, ბეგლარ სიორიძის შტაბი აცხადებს, რომ როყვას დაკარგვის შესახებ გავრცელებული დეზინფორმაცია დამოუკიდებელი კანდიდატის, კოტე შრაშენიძის ინტერესებში იყო.

"მადლობას ვუხდით შინაგან საქმეთა სამინისტროს დროული რეაგირებისთვის, რითაც წერტილი დაესვა კოტე შარაშენიძის შტაბის მიერ წარმოებულ ორდღიან დეზინფორმაციულ კამპანიას. გიორგი როყვა ოზურგეთშია და მისი უფლებები დაცულია.

ახლა უკვე ცხადია, რომ ეს ე.წ. სპექტაკლი კოტე შარაშენიძეს დასჭირდა ერთადერთი მიზნისთვის: როგორმე გადაეფარა „ევროპული საქართველოს“ წევრის, გიორგი როყვას მონაცემების გაყალბებით შეტანა საკუთარ საარჩევნო წარმომადგენელთა სიაში, რის შესახებაც როყვამ თავად მიმართა მედიასაშუალებებს.

შარაშენიძემ იცრუა, როდესაც განაცხადა, რომ როყვა მისი საინიციატივო ჯგუფის წევრი და მხარდამჭერია - სინამდვილეში გიორგი როყვა პარტია „ევროპული საქართველოს“ წევრია და დოკუმენტურად დასტურდება, რომ ადგილობრივ არჩევნებში ის „ევროპული საქართველოს“ კანდიდატი იყო.

შარაშენიძემ ასევე იცრუა, როდესაც გიორგი როყვას გაუჩინარებაზე განცხადებები გააკეთა და აღნიშნული ფაქტი პოლიტიკური სპეკულაციებისთვის გამოიყენა, მაშინ როდესაც გიორგი როყვას ოჯახს პოლიციისთვის არც კი მიუმართავს და ოჯახის წევრები მას გაუჩინარებულად არ მიიჩნევდნენ. სამწუხაროა, რომ ჩვენი ოპონენტი საკუთარ საარჩევნო კამპანიას შანტაჟსა და დეზინფორმაციაზე აგებს. ჩვენ თავს ვიკავებდით წინასწარი განცხადებების გაკეთებისგან. დღეს უკვე შეგვიძლია მოვუწოდოთ შესაბამის სამსახურებს და დამკვირვებლებს, დაინტერესდნენ აღნიშნული ფაქტით და პირის თანხმობის გარეშე მონაცემებით მანიპულირებას სათანადო შეფასებები მისცენ“, - ნათქვამია სიორიძის შტაბის განცხადებაში.

გიორგი როყვას გაუჩინარების შესახებ ინფორმაცია გუშინ გავრცელდა. ის არჩევნების პირველ ტურში „ევროპული საქართველოდან“ დეპუტატობისთვის იბრძოდა. შარაშენიძის შტაბის უფროსის, ირაკლი სირაძის განცხადებით, როყვა მეორე ტურში მათ დაუკავშირდა და უბანზე წარმომადგენლად დარეგისტრირების სურვილი გამოთქვა.

ადგილობრივი თვითმმართველობის არჩევნების მეორე ტური 6 თვითმმართველ ქალაქსა და თემში 12 ნოემბერს გაიმართება. მეორე ტური ჩატარდება: ქუთაისში, ხაშურში, ბორჯომში, ოზურგეთში, ყაზბეგში და მარტვილში.

21 ოქტომბერს საქართველოში თვითმმართველობის არჩევნები ჩატარდა.