გუბაზ სანიკიძე მაგისტრატი მოსამართლის თანდასწრებით გამოიკითხა

პოლიტიკური პარტია „გამარჯვებული საქართველოს" ლიდერმა გუბაზ სანიკიძემ „ქრონიკასთან“  მაგისტრატი მოსამართლის თანდასწრებით გამოკითხვის დეტალებზე ისაუბრა. გუბაზ სანიკიძე გამოკითხვაზე 20 ივნისის საქმეზე იყო დაბარებული. 

სანიკიძის ინფორმაციით, გამოძიებას ძირითადი შეკითხვები პოლიტიკურ ლიდერებთან, მათ მოწოდებებსა და ქმედებებთან დაკავშირებით ჰქონდა:

„შეკითხვები ასევე იყი პროტესტის მიმდინარეობასა და სამართალდამცველების ქმედებებთან დაკავშირებითაც. გამოძიებას ასევე აინტერესებდა თუ სად იმყოფებოდა გუბაზ სანიკიძე შეტაკების დროს, რაზეც ვუპასუხე, რომ იმ მომენტისთვის რუსთაველის გამზირზე არ ვიყავი და ადგილზე მოგვიანებით მივედი“, - განაცხადა სანიკიძემ.

ძალოვან უწყებას ამავე საქმეზე გამოკითხვაზე დაბარებული ჰყავს ბაჩუკი ქარდავა, ხატია დეკანოიძე, ირაკლი ოქრუაშვილი და ირაკლი ღლონტი.

საქმე ეხება 20-21 ივნისის მოვლენებს, რის გამოც გამოძიება ორი, 225-ე და 315 მუხლებით მიმდინარეობს. რაც ჯგუფური ძალადობის ორგანიზებას, ამბოხებას, სახელმწიფო ხელისუფლების ძალადობრივ დამხობას გულისხმობს.

შინაგან საქმეთა სამინისტროში გამოკითხვაზე უარის შესახებ ოპოზიციის წარმომადგენლებმა ძალოვან უწყებას უკვე აცნობეს. 

20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.