ხაზარაძემ და ჯაფარიძემ შესაძლოა სტრასბურგის სასამართლოს მიმართონ

„თიბისი“ ბანკის დამფუძნებლების მამუკა ხაზარაძისა და ბადრი ჯაფარიძის ადვოკატი ზვიად კორძაძე არ გამორიცხავს, რომ ხაზარაძემ და ჯაფარიძემ ე.წ. „თიბისის“ საქმეზე ადამიანის უფლებათა ევროპულ სასამართლოს მიმართონ. ამის შესახებ მან ჟურნალისტებს განუცხადა.

„თიბისის“ საქმე გასცდა საქართველოს იურისდიქციის ფარგლებს. პროკურატურამ რამდენჯერმე მიმართა შუამდგომლობით დიდ ბრიტანეთს. ამასთან ერთად, საქმეში უკვე დაგროვდა მასალები, რომლითაც ჩვენ შეიძლება სტრასბურგს მივმართოთ. ამ მიზნით საქმეში ჩაერთო ორი გამოცდილი, კვალიფიციური და აღიარებული ადვოკატი.

პირველი არის ბრიტანეთის დედოფლის იურისტის საპატიო ტიტულის მფლობელი, საერთაშორისო აღიარების მქონე სისხლის სამართლის სპეციალისტი და სამოცწლიანი გამოცდილების მქონე იურიდიული ფირმის ხელმძღვანელი სტივენ ქეი. ის არის ევროპის სისხლის სამართლის ადვოკატთა ასოციაციისა და საერთაშორისო სისხლის სამართლის ბიუროს თანადამფუძნებელი და წევრი, რომელიც მრავალი წლის განმავლობაში ინგლისის და უელსის სისხლის სამართლის ადვოკატთა ასოციაციის მდივანი იყო. სტივენ ქეი საზღვარგარეთ მამუკა ხაზარაძის და ბადრი ჯაფარიძის ინტერესებს დაიცავს.

მეორე ადვოკატი არის ფრანგი ადვოკატი ვინსენტ ბერგერი - ევროპის კოლეჯის საპატიო პროფესორი, ევროპის ადვოკატთა საბჭოსა და სამართლის საზოგადოებების (CCBE) ექსპერტი. ის წლების განმავლობაში ევროპის ადამიანის უფლებათა სასამართლოში იკავებდა სხვადასხვა პოზიციას და იყო ევროსაბჭოს ექსპერტი“, - განაცხადა კორძაძემ.

მამუკა ხაზარაძისა და ბადრი ჯაფარიძის ინფორმაციით, გენერალურმა პროკურატურამ საქართველოში მოქმედი დიპლომატიური კორპუსის წარმომადგენლები 6 სექტემბერს გენერალურ პროკურატურაში დახურულ შეხვედრაზე მიიწვია, რომელზეც დაგეგმილია პროკურატურის მიერ დაქირავებული ორი საერთაშორისო ექსპერტის მომზადებული დასკვნის წარდგენა ხაზარაძე-ჯაფარიძის საქმესთან დაკავშირებით.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონამდე დოლარის ტრანზაქციაზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით)“.   

მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით თითოეულს 700 000 ლარიანი გირაო შეუფარდა. როგორც ცნობილია პროკურატურა მილიონიან გირაოს მოითხოვდა. 

ასევე, ამ საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას. საქალაქო სასამართლომ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა, რაც მისმა ადვოკატმა გაასაჩივრა.