სასამართლო „თიბისის საქმეზე“ დაცვის მტკიცებულების კანონიერებაზე მსჯელობს

თბილისის საქალაქო სასამართლოში „თიბისი ბანკის საქმეზე“ მორიგი სხდომა მიმდინარეობს. მოსამართლემ წინა სხდომაზე დაყენებულ შუამდგომლობასთან დაკავშირებით გადაწყვეტილება უნდა გამოაცხადოს.

სხდომის დაწყებამდე ხაზარაძემ სასამართლო პროცესს აბსურდი კიდევ ერთხელ უწოდა. „თიბისი ბანკის“ დამფუძნებელი დარწმუნებულია, რომ ეს პროცესი ხელისუფლების კრახით დამთავრდება.

„ეს აბსურდული შოუ და თეატრი ბიძინა ივანიშვილის სასამართლოში დამთავრდება სრული კრახით. მე დავდე პირობა და ამის მოწმეები გახდებით, რომ ეს თითიდან გამოწოვილი ბრალდებები და აბსურდი საქართველოში დასრულდება“, - აღნიშნა ხაზარაძემ.

რაც შეეხება ბრალდების მხარეს, პროკურატურა ელოდება, რომ სასამართლო დღეს დააკმაყოფილებს მათ შუამდგომლობას და დაცვის მხარის წარმოდგენილ მტკიცებულებებს, კერძოდ კი, ხაზარაძის ადვოკატების მიერ უცხოეთში ჩატარებულ საგამოძიებო მოქმედებებს დაუშვებლად ცნობს. 

„დოკუმენტები მათ გადაეცათ მათთვის გასაგებ ენაზე. რაც შეეხება იმას, რომ ისინი არ იცნობენ ქართულ კანონმდებლობას, უკანონო შემოსავლის ლეგალიზაცია არის ტრანსნაციონალური დანაშაული, რომელიც მოქმედებს სხვადასხვა ქვეყნებში, მათ შორის იქაც, სადაც ეს ექსპერტები საქმიანობენ. ერთ-ერთი მათგანი ისრაელის ყოფილი გენერალური პროკურორი, მეორე კი აშშ-ის იუსტიციის დეპარტამენტის ორგანიზებულ დანაშაულთან ბრძოლის სამსახურის ყოფილი დირექტორია. ჩვენ ვაცხადებთ, რომ საგამოძიებო მოქმედებები ჩატარებულია უცხო ქვეყნის ტერიტორიაზე, სადაც არ მოქმედებს ჩვენი სისხლის სამართლის საპროცესო კანონმდებლობა“, - აცხადებს პროკურორი არჩილ ტყეშელაშვილი.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონამდე დოლარის ტრანზაქციაზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

მამუკა ხაზარაძესა და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით)“.  მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით, თითოეულს 700 000 ლარიანი გირაო შეუფარდა. ამავე საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას. საქალაქო სასამართლომ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა, რაც მისმა ადვოკატმა გაასაჩივრა.