ქართული მარშის წევრებისა და ლადო სადღობელაშვილის პროცესი გადაიდო

თბილისის საქალაქო სასამართლოში ლადო სადღობელაშვილისა და "ქართული მარშის" წევრების სასამართლო პროცესი გადაიდო. მოსამართლემ მხარეებს საქმის მასალების, კერძოდ კი ვიდეოჩანაწერების გასაცნობად, დრო 15 სექტემბრამდე მისცა, სხდომა 15 სექტემბერს 09:00 საათზე განახლდება.

დაცვის მხარეს შეკითხვები ლადო სადღობელაშვილის დაკავებაზე - საქმის მასალაში წერია, რომ მან სამართალდამცველებს ანთებული მაშხალა "ფონდ ღია საზოგადოება საქართველოსთან" ესროლა, თუმცა ის კახა კალაძის საარჩევნო შტაბთან დააკავეს.

ლადო სადღობელაშვილი გუშინდელ აქციაზე ადმინისტრაციული წესით დააკავეს 166-ე და 173-ე მუხლების დარღვევისთვის, რაც პოლიციელის კანონიერი მოთხოვნისადმი დაუმორჩილებლობასა და წვრილმან ხულიგნობას გულისხმობს.

12 სექტემბერს ფონდ “ღია საზოგადოება საქართველოს “ ოფისთან  “ქართული მარშის წევრებმა“ აქცია მოულოდნელი გადაწყვეტილებით დაიწყეს - მათ სამართალდამცველებს მაშხალები დაუშინეს და “ქართული ოცნების“ მერობის კანდიდატის, კახა კალაძის შტაბისკენ დაიძრნენ.

მოძრაობა “ქართულმა მარშმა“ 11 სექტემბერს რადიკალური და გრძელვადიანი აქციები დააანონსა და საქართველოს ხელისუფლებას მოუწოდა, რომ მიწა უცხოელებზე არ გაყიდოს. 

15 ივნისს პარლამენტმა სასოფლო-სამეურნეო მიწის უცხო ქვეყნის მოქალაქეზე გასხვისებაზე მორატორიუმი პირველი მოსმენით მიიღო. მორატორიუმს მხარი არ დაუჭირა „ნაციონალურმა მოძრაობამ“ და „ევროპულმა საქართველომ“.

6 სექტემბერს ცნობილი გახდა, რომ სასოფლო-სამეურნეო დანიშნულების მიწის შეძენასთან დაკავშირებით კანონით დადგენილი შეზღუდვა კომერციულ ბანკებზე არ გავრცელდება. ეს შეზღუდვა ასევე არ გავრცელდება განსკუთრებულ შემთხვევებზე, რომლებიც მთავრობის გადაწყვეტილებით განისაზღვრება.