დაცვის მხარე განმარტავს, რატომ არ ენდობა ჩატაევი-მაჩალიკაშვილის კავშირების დამადასტურებელ ახალ მასალებს

თემირლან მაჩალიკაშვილის და აჰმედ ჩატაევის კავშირს ოჯახის ადვოკატი მარიამ კუბლაშვილი ისევ უარჰყოფს. დაცვის მხარის თქმით, ახალი ჩანაწერების გამოქვეყნების შემდეგ, საქმესთან დაკავშირებით უფრო მეტი შეკითხვა ჩნდება, ვინაიდან მათთვის გაუგებარია ვინ და როგორ დაადგინა თუ რა ნომერი ჰქონდა აჰმედ ჩატაევს. დაცვის მხარის წევრების მტკიცებით, ამ დრომდე საქმეში არ არსებობს ინფორმაცია ჩატაევის მობილური ნომრის შესახებ.

ამასთან, ადვოკატებს ვარაუდიც აქვთ, რომლის მიხედვითაც მას შემდეგ რაც, ამერიკელმა ექსპერტებმა თემირლან მაჩალიკაშვილის მობილური ტელეფონის მონაცემები შეისწავლეს, მასში ერთ-ერთი უცხო ნომერი აღმოჩნდა. ადვოკატების ვარაუდით, სუსმა და პროკურატურამ მოგვიანებით ეს ნომერი აჰმედ ჩატაევს დაუკავშირა. ამასთანავე, ადვოკატები ამბობენ, რომ ძალოვნებმა ეს ვერსია ერთ-ერთი ცრუ მოწმის ჩვენებით გაამყარეს, რომელმაც სასამართლო დარბაზში (დაკავებიდან რამდენიმე თვის შემდეგ) თქვა, რომ მას ახსოვდა თითქოს ჩატაევის ნომერი მთავრდებოდა რიცხვი "20"-ით. 

ამ ყველაფრიდან გამომდინარე, ადვოკატები ახალ გარემოებებს და მონაცემებს უნდობლობას უცხადებენ.

რაც შეეხება ბინას, რომელშიც თემირლან მაჩალიკაშვილი რამდენიმე ადამიანთან ერთად ცხოვრობდა, რომელთაგან ორი მოგვიანებით ტერორიზმის საქმეში ბრალდებული აღმოჩნდა. ადვოკატი მარიამ კუბლაშვილი ადასტურებს, რომ თემირლან მაჩალიკაშვილი ნამდვილად ცხოვრობდა ვარკეთილში ნაქირავებ ბინაში ამ ადამიანებთან ერთად, თუმცა მარიამ კუბლაშვილი ასევე ამტკიცებს, რომ თემირლან მაჩალიკაშვილმა არ იცოდა მათი ტერორისტული საქმიანობის შესახებ. 

ახალ გარემოებებთან დაკავშირებით, კავკასიოლოგი მამუკა არეშიძე აცხადებს, რომ სულ მცირე აღარ უნდა არსებობდეს შეკითხვები იმასთან დაკავშირებით, რომ თემირლან მაჩალიკაშვილს ჰქონდა ინფორმაცია ამ ადამიანების ტერორისტულ ორგანიზაციებთან თანამშრომლობის შესახებ. 

თავად მაჩალიკაშვილის მამას მალხაზ მაჩალიკაშვილს მიაჩნია, რომ ხელისუფლება ამ მასალებით "ახალ ჭორებს ავრცელებს".

ბერი გაბრიელ სალოსი ქუჩაზე ანტიტერორისტული სპეცოპერაცია 2017 წლის 21-22 იანვარს ჩატარდა. შედეგად დააკავეს ერთი ადამიანი -  შუაიფ ბორზიევია, ხოლო წინააღმდეგობის გაწევისას გარდაიცვალა სამი ადამიანი, მათ შორის ერთ-ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელწმიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც  ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ. მათ არა ერთხელ გამართეს საპროტესტო აქციები, მათ შორის ბოლო რამდენიმე კვირის წინ პანკისში ჩატარდა.