ლონდონის ექსპერტიზის ბიუროს დასკვნით, „ომეგა ჯგუფის“ საქმეზე ჩანაწერები დამონტაჟებულია

"ომეგა ჯგუფის" საქმის ჩანაწერებზე ვანო ჩხარტიშვილის ადვოკატმა ზაზა ხატიაშვილმა ექსპერტიზის ახალი დასკვნა გამოაქვეყნა. ადვოკატი ამბობს, რომ ვანო ჩხარტიშვილის მხარემ გავრცელებული ჩანაწერების შესწავლის თხოვნით ბრიტანელ ექსპერტს, მეთიუ ჯეიმს სტივენსს მიმართა.

ხატიაშვილის განცხადებით, ექსპერტიზა ჩანაწერების იმ ვერსიას ჩაუტარდა, რომლიც მედიაში გავრცელდა. მისივე თქმით, ეს არის მეორე უცხოური ექსპერტიზის დასკვნა, რომელიც ჩანაწერების მონტაჟს ადასტურებს. ადვოკატის თქმით, დამონტაჟებულია სიტყვები და ფრაზებიც.

ექსპერტიზის დასკვნაში აღნიშნულია, რომ სამი აუდიოჩანაწერის ექსპერტიზის შედეგად 12 ანომალია დაფიქსირდა, რომლებიც სარწმუნო ახსნა-განმარტებების არარსებობის შემთხვევაში, მხოლოდ მანიპულაციად შეიძლება განიხილებოდეს.

"ეს ანომალიები მოიცავს საუბრის მონაკვეთებს შორის არსებულ წყვეტის მონაკვეთებს და ზოგ შემთხვევაში ხდება სიტყვაში/სიტყვებში არაბუნებრივ მომენტებში. ამ ექსპერტიზით არაორაზროვნად დასტურდება, რომ აუდიო ჩანაწერებში არსებობს წყვეტა. არ არსებობს იმის თქმის დამადასტურებელი მტკიცებულება, რომ აღნიშნული სამი ჩანაწერის ჩაწერა ერთსა და იმავე დღეს განხორციელდა. ეს აშკარა მანიპულაცია ბადებს ეჭვებს ჩანაწერების ნამდვილობასთან და სანდოობასთან დაკავშირებით. ვიტოვებ უფლებას, გადავხედო ჩემს დასკვნებს იმ შემთხვევაში, თუ შემდგომში მექნება წვდომა ორიგინალ ჩანაწერებთან და ჩამწერ მოწყობილობასთან", - წერია ბრიტანელი ესპერტის მიერ დაწერილ დასკვნაში.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„იბერიისა" და „ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

3 ოქტომბერს თბილისში საქალაქო სასამართლოში დაკითხვიდან გამოსულმა სპორტის ყოფილმა მინისტრმა ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელთან ერთად, შეთანხმებულად, ჩაწერა. მისი თქმით, ის მუშაობდა ომეგა ჯგუფში და მისი მოვალეობა იყო სხვა პირებთან კონტაქტის დამყარება.