თურნავა: „ეიპიემ ტერმინალს“ უფლება აქვს მთავრობის გადაწყვეტილება სამართლებრივად შეისწავლოს

ეკონომიკისა და მდგრადი განვითარების მინისტრის ნათია თურნავას განცხადებით, „ეიპიემ ტერმინალს“ მთავრობის გადაწყვეტილების სამართლებრივ ჭრილში განხილვის სრული უფლება  აქვს. ამის შესახებ მან ჟურნალისტებს თემის კომენტირებისას განუცხადა.

,,ეიპიემ ტერმინალსი არის გლობალური ინვესტორი, რომელიც ძალიან მნიშვნელოვან კონტრიბუციას აკეთებს ჩვენი ქვეყნის ლოგისტიკის განვითარებისთვის. ფოთის პორტი უმნიშვნელოვანესი ობიექტია ჩვენთვის და ძალიან ვაფასებთ ამ ინვესტორის წვლილს. მათ რა თქმა უნდა უფლება აქვთ სამართლებრივ ჭრილში განიხილონ ჩვენი გადაწყვეტილება და რაც მთავარია მათთან ურთიერთობაც კანონთან შესაბამისობაში უნდა იყოს მოყვანილი“- განაცხადა თურნავამ. 

მისი თქმით ყველა დარღვევა, რომელიც ეკონომიკის სამინისტრომ აღმოაჩინა უნდა აღმოიფხვრას:

„სხვაგვარად ეს არ ეკადრება არც ამ გლობალურ ინვესტორს და არც ჩვენს სახელმწიფოს და ეკონომიკის სამინისტროს. მეორე, ნებისმიერ ასეთ წინადადებას ჩვენ რასაკვირველია განვიხილავთ ანაკლიის პორტის პრიორიტეტის კონტექსტში. ჩვენ კვლავაც ვადასტურებთ პრიორიტეტულ მიმართებას ანაკლიასთან. ეს არის სტრატეგიული პრიორიტეტი, ეს არის ქვეყნის დამოუკიდებლობის გარანტი - ამ კონტექსტში განვიხილავთ ქვეყანაში საპორტო ინფრასტრუქტურის და ლოგისტიკის განვითარებას,"- განაცხადა თურნავამ.

„ეიპიემ ტერმინალსმა“ ეკონომიკის მინისტრის ნათია თურნავას ბრძანების სამართლებრივი შესწავლის შესახებ 31 მაისს განაცხადა. 

ფოთში ახალი ღრმაწყლოვანი ნავსადგურის მშენებლობის ნებართვის დოკუმენტი გაუქმებულია. თანამდებობიდან გადაყენებულია მშენებლობისა და ტექნიკური ზედამხედველობის სააგენტოს ხელმძღვანელი, რომელმაც ამის ნებართვა გასცა, - ამის შესახებ მანამდე ეკონომიკისა და მდგრადი განვითარების მინისტრმა ნათია თურნავამ განაცხადა.

ეკონომიკისა და მდგრადი განვითარების სამინისტროს (სსიპ) ტექნიკური და სამშენებლო ზედამხედველობის სააგენტოს ყოფილი უფროსის გრიგოლ კაკაურიძის განცხადებით, ფოთში ახალი ღრმაწყლოვანი ნავსადგურის მშენებლობის ნებართვის დოკუმენტთან დაკავშირებული გადაწყვეტილება მან ისე მიიღო, რომ მოქმედი მინისტრი ნათია თურნავა საქმის კურსში არ ჩაუყენებია.

ანაკლიის ღრმაწყლოვანი პორტის მშენებლობის შეწყვეტის საფრთხის შესახებ ინფორმაცია „ანაკლიის განვითარების კონსორციუმმა” 29 მაისს გაავრცელა.

ქალაქ ფოთში ახალი საზღვაო ნავსადგურის მშენებლობის შესახებ ინფორმაცია ფოთის მერიამ  გაავრცელა. მშენებლობის ნებართვა ეკონომიკის სამინისტროს ტექნიკური ზედამხედველობის სააგენტომ გასცა.

ანაკლიის ღრმაწყლოვანი პორტის მშენებლობის დაფინანსების საკითხზე 21 მაისს მოლაპარაკებების მეორე რაუნდი გაიმართა. მხარეებმა კრედიტორი ინსტიტუტების მიერ წარმოდგენილი 8-პუნქტიანი მოთხოვნა განიხილეს.

შეხვედრის შემდეგ „თიბისი ბანკის” თანადამფუძნებელმა ბადრი ჯაფარიძემ განაცხადა, რომ ანაკლიის პროექტს არანაირი შეფერხება არ ემუქრება. 

მიმდინარე წლის 7 მაისს ვიცეპრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა ანაკლიის მშენებარე პორტის ტერიტორია დაათვალიერა. 

ანაკლიის ღრმაწყლოვანი პორტის მშენებლობა 2017 წლის დეკემბერში ადრეული სახმელეთო სამუშაოებით დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

რა ეტაპზეა ანაკლიის პორტის მშენებლობა, ნახეთ ამ ბმულზე.