ბახტაძე: ანაკლიის პორტზე პომპეოს განცხადებაში ინტერპრეტაციის არანაირი დიაპაზონი არ არსებობს

საქართველო უნდა გახდეს რეგიონის ეკონომიკური და სატრანსპორტო ჰაბი და ანაკლიის პორტს ამ სტრატეგიაში თავისი განსაკუთრებული როლი აქვს, აქ ინტერპრეტაციის არანაირი დიაპაზონი არ არსებობს, - ასე აფასებს პრემიერმინისტრი მამუკა ბახტაძე „ქრონიკასთან“ საუბარში ანაკლიის ღრმაწყლოვანი პორტის პროექტთან დაკავშირებით აშშ-ის სახელმწიფო მდივნის მაიკ პომპეოს განცხადებას და იმას, თუ რა კომენტარი მოჰყვა ამ განცხადებას რუსეთის საგარეო საქმეთა მინისტრის მოადგილის გრიგორი კარასინის მხრიდან.

„რაც შეეხება ანაკლიის საკითხს, აქ ინტერპრეტაციის არანაირი დიაპაზონი არ არსებობს. გვაქვს დეკლარაცია, რომელიც ჩვენი შეხვედრის შედეგად გავაფორმეთ, და კონკრეტული გზავნილები, რომლებიც პრესკონფერენციაზე გავაკეთეთ. ამ დოკუმენტში დაფიქსირებულია უმნიშვნელოვანესი საკითხი, რომ სწორედ საქართველო უნდა გახდეს რეგიონის ეკონომიკური და სატრანსპორტო ჰაბი. ბუნებრივია, ანაკლიას ამ სტრატეგიაში თავისი განსაკუთრებული როლი აქვს. ჯერ კიდევ „საქართველოს რკინიგზის“ ხელმძღვანელად მუშაობის პერიოდში სწორედ მე ვამბობდი, რომ თუ ჩვენ სატრანსპორტო ინფრასტრუქტურას განვავითარებდით ისე, რომ მსხვილი მოთამაშეების მოზიდვას და აზიისა და ევროპის ბაზრების ინტეგრირებას შევძლებდით, საქართველოს გაუჩნდებოდა შანსი, რომ ყოფილიყო ეს სატრანსპორტო ცენტრი. ამ დოკუმენტში სწორედ ეს არის ასახული. აქედან გამომდინარე, საქართველოში ნებისმიერი პროექტის, განსაკუთრებით ანაკლიის განვითარება სწორედ ამ ჭრილში უნდა წარმოვიდგინოთ. ბუნებრივია, ჩვენ გვჭირდება ღრმაწყლოვანი პორტი, რათა ჩვენი სატრანსპორტო პოტენციალის რეალიზაცია მოვახდინოთ.  

რაც შეეხება გრიგორი კარასინის შეფასებას, ჩემს აღქმაში ეს განცხადება იყო იგივე, რასაც რუსეთი ბოლო წლების განმავლობაში მუდმივად ცდილობს თავისი პროპაგანდით - შექმნას ერთგვარი განცდა იმისა, რომ სწორედ მოსკოვს აქვს ვეტოს უფლება საქართველოს საგარეო პრიორიტეტებთან დაკავშირებით. ამას ემსახურება მათი პროპაგანდა. კიდევ ერთხელ გავიმეორებ: ეს დრო ჩაბარდა წარსულს. საქართველო არის დამოუკიდებელი ქვეყანა და მის მომავალს კრემლი არ განსაზღვრავს. ჩვენმა ერმა თავისი ცივილიზაციური არჩევანი უკვე გააკეთა“, - განაცხადა პრემიერმა.

ანაკლიის პორტთან დაკავშირებით გრიგორი კარასინმა განაცხადა, რომ რუსეთს არ მოსწონს აშშ-ის სახელმწიფო მდივნის, მაიკ პომპეოს განცხადების ტონი ანაკლიის ღრმაწყლოვანი პორტის შესახებ. 

„საქართველომ უნდა გადაწყვიტოს, რა მოუხერხოს ანაკლიის პორტს. მაგრამ რაც რუსეთისა და ჩინეთის მიმართ ითქვა, სულაც არ არის ის ტონი, რაც ჩვენ გვაწყობს“, - განაცხადა კარასინმა.

როგორც ვაშინგტონში პრემიერმინისტრ მამუკა ბახტაძესთან გამართული შეხვედრის შემდეგ აშშ-ის სახელმწიფო მდივანმა მაიკ პომპეომ განაცხადა, ის იმედოვნებს, რომ საქართველო აანკლიის პორტის მშენებლობის პროექტს დაასრულებს.

„იმედი გამოვთქვი, რომ საქართველო დაასრულებს პორტის მშენებლობლის პროექტს და ამით გაძლიერდება საქართველოს ურთიერთობა თავისუფალ ეკონომიკურ სივრცეებთან და იმავდროულად ქვეყნის პოზიცია დაცული გახდება რუსეთის ან  ჩინეთის ეკონომიკური გავლენებისგან.  ეს ვითომ მეგობრები საქართველოს ინტერესებს არ იზიარებენ”, - განაცხადა პომპეომ.

რა ეტაპზეა ანაკლიის პორტის მშენებლობა, ნახეთ ამ ბმულზე.