პრემიერი: ლარი ზედმეტად გაუფასურებულია

საქართველოს პრემიერმინისტრის, მამუკა ბახტაძის განცხადებით, ლარი ზედმეტად გაუფასურებულია. მისი განმარტებით, ნებისმიერი ანალიზი აჩვენებს, რომ დღეს ფუნდამენტური ფაქტორები საკმაოდ ძლიერი, რის გამოც ლარი გაუფასურდა. ამის შესახებ პრემიერმა ჟურნალისტებთან განაცხადა. მის კომენტარს მთავრობის ადმინისტრაცია ავრცელებს. 

პრემიერმინისტრის თქმით, მაისის და ივნისის მაჩვენებლები ტურიზმიდან შემოსავლების კუთხით საქართველოს ისტორიაში საუკეთესო იყო და არსებობდა ეკონომიკაში ტურიზმის სექტორიდან მეტი შემოსავლის მობილიზების მოლოდინი, რაც, ბოლო მოვლენების გამო ვერ მოხდა. 

"ნებისმიერი ანალიზი გვიჩვენებს, რომ დღეს ფუნდამენტური ფაქტორები არის საკმაოდ ძლიერი, აქედან გამომდინარე, ლარი ზედმეტად გაუფასურებულია. ეს არის ექსპერტების დასკვნა. ეროვნულმა ბანკმა გააკეთა განმარტება. ბუნებრივია, ის არის დამოუკიდებელი ორგანო, რომელსაც აქვს თავისი მოსაზრება და ეს მოსაზრება ობიექტურია. რა თქმა უნდა, მნიშვნელოვანია, რომ ეროვნულმა ბანკმა აკონტროლოს ინფლაციის ნიშნული და აუცილებლად უნდა ჩაერიოს იმ შემთხვევაში, როდესაც პარამეტრები შეიცვლება. ბუნებრივია, მე მაქვს ეს მოლოდინი და ეროვნულმა ბანმა ეს დაადასტურა. ჩვენ მაქსიმალურად გახსნილი ვართ კომუნიკაციისთვის, ჩვენ ბიზნესს ვხვდებით ყოველდღიურ რეჟიმში, ხვალაც, ზეგაც იქნება ამის შესახებ საუბარი. ადგილი აქვს პრობლემა - შემოსავლები ტურიზმიდან დაეცა, მაგრამ დარწმუნებული ვარ, იმ სამოქმედო გეგმით, რომელიც წარდგენილია, იმ წინადადებებით, რომელიც მოვისმინეთ ბიზნესისგან, შევძლებთ, ეს პრობლემები გადავლახოთ",- აღნიშნა პრემიერმა.

ლარის გაუფასურებასთან დაკავშირებით ბიზნესი ქვეყნის მთავარი ფინანსური ინსტიტუტისაგან მეტ კომუნიკაციას ითხოვს და სამოქმედო გეგმას ელის.

ბიზნესმენთა ერთი ნაწილი ეროვნულ ბანკს და მთავრობას არასაკმარისი კომუნიკაციის გამო საყვედურობს, რაც მათ საკუთარი ქცევის განსასაზღვრად სჭირდებათ. ბანკირთა ნაწილი კი აღმასრულებელ გუნდს დადებითი მოლოდინების შექმნას ურჩევს. 

პარლამენტის საფინანსო-საბიუჯეტო კომიტეტის თავმჯდომარემ, ირაკლი კოვზანაძემ ეროვნულ ბანკს ბიზნესსა და მოსახლეობასთან მეტი კომუნიკაციისა და „ვერბალური ინტერვენციებისკენ“ მოუწოდა.

საქართველოს ეროვნულმა ბანკმა ლარის ოფიციალური გაცვლითი კურსი დაადგინა. 31 ივლისს 1 აშშ დოლარის ოფიციალური ღირებულება 2.9507 ლარი იქნება, 1 ევრო კი 3.2889 ეღირება.

პირველად ლარის ისტორიაში, კომერციულ ბანკებში დადგენილი გაცვლითი კურსით 1 დოლარი 3 ლარი ღირს. ჯამში, დღეს ეროვნული ვალუტა დოლართან და ევროსთან მიმართებით 2 თეთრით გაუფასურდა.