ლევან ახვლედიანი: ანაკლიის პროექტის მხარდაჭერის ნაცვლად მთავრობამ მისი საბოტაჟი არჩია

იმის ნაცვლად, რომ მთავრობას ანაკლიის პროექტისთვის მხარდაჭერა გამოეცხადებინა, რამდენიმე მიმართულებით მისი საბოტაჟი განახორციელა, - ამის შესახებ „ანაკლიის განვითარების კონსორციუმის” გენერალურმა დირექტორმა, ლევან ახვლედიანმა განაცხადა.

მისივე თქმით, მთავრობას ყველაფერი უნდა გაეკეთებინა და ყველანაირი მხარდაჭერა უნდა გამოეცხადებინა პროექტისთვის, რათა ის წარმატებით განხორციელებულიყო.

„სამწუხაროდ, რეალობა არის აბსოლუტურად საპირისპირო. მინდა დაგისახელოთ ორი კონკრეტული ფაქტი, რომელიც ბოლო 6 კვირის განმავლობაში მოხდა. სამეთვალყურეო საბჭოსთან ერთად ურთულეს ვითარებაში შევძელით დიდი ძალისხმევის შედეგად მოგვეძიებინა ორი ახალი ინვესტორი, რომელიც დაინტერესდა ამ პროექტით. ერთი იყო ყაზახურ-ჰონგკონგური ჯგუფი, მეორე კი ძალიან მსხვილი ამერიკული საინვესტიციო ჯგუფი. პირველ ინვესტორს მთავრობამ გაცნობით შეხვედრაზე პირდაპირ უთხრა, რომ მათ ინვესტიციას არ მიესალმებოდნენ, რადგან დასავლური ქვეყნიდან არ იყვნენ. ჩვენშიც და ამ კომპანიაშიც ასეთმა დამოკიდებულებამ შეშფოთება გამოიწვია. რაც შეეხება ამერიკულ ფონდს, მათ მთავრობისგან წერილობითი განცხადება მოითხოვეს, რომ ხელისუფლებაში ამ ინვესტიციას მიესალმებიან. მთავრობა დაგვპირდა, რომ ასეთ წერილს ფონდს გაუგზავნიდა, მაგრამ წერილი ადრესატს არ მიუღია“, - განაცხადა ახვლედიანმა.

ახვლედიანი გამოეხმაურა ინფრასტრუქტურის მინისტრ მაია ცქიტიშვილის მოწოდებას და განაცხადა, რომ „ანაკლიის განვითარების კონსორციუმი“ სამინისტროსთვის გაგზავნილი წერილის გასაჯაროებას არ აპირებს. 

„წერილის შინაარსს ვერ გავასაჯაროებთ, რადგან არ ვაპირებთ ხელშეკრულების დარღვევას, მაგრამ მინდა გითხრათ, რომ მასში ზუსტად არის აღწერილი, თუ რა ნაბიჯებია საჭირო იმისთვის, რომ პროექტი წინ წავწიოთ, ამიტომ არ ვეთანხმები დღევანდელ განცხადებას იმის თაობაზე, რომ, თურმე, იქ არაფერი წერია შემდეგ ნაბიჯებთან დაკავშირებით“, - განაცხადა ლევან ახვლედიანმა.

მაია ცქიტიშვილის განცხადებით, ვალდებულებების შეუსრულებლობის შემთხვევაში, მთავრობას „ანაკლიის განვითარების კონსორციუმთან“ გაფორმებული საინვესტიციო ხელშეკრულების მოშლა შეუძლია.

ანაკლიის ღრმაწყლოვანი პორტის მშენებლობა 2017 წლის დეკემბერში დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

26 ივლისს ცნობილი გახდა, რომ საქართველოს გენერალური პროკურატურის მიერ „თიბისი ბანკის საქმეზე“  დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილება მიიღეს.

ასევე, ცოტა ხნის წინ, ანაკლიის პროექტი მსხვილმა ამერიკულმა ინვესტორმა - „კონტი ჯგუფმა“ დატოვა. ამ ეტაპზე, კონსორციუმი, ინვესტორებთან დაკავშირებით, მთავრობასთან მოლაპარაკებას აწარმოებს.

რას აპირებდა მთავრობა, თუკი „ანაკლიის კონსორციუმი“ ვერ შეასრულებდა ვალდებულებებს - ამ თემაზე ვრცლად შეგიძლიათ წაიკითხოთ რეგიონული განვითარებისა და ინფრასტრუქტურის მინისტრის მაია ცქიტიშვილის ინტერვიუ.