რევაზ არველაძე: "ხუდონჰესის"ინვესტორსა და მთავრობას შორის სამართლებრივ დავას არ გამოვრიცხავ

bm.ge-ს ცნობით, საპარლამენტო უმრავლესობის წევრის, ენერგეტიკოსის რევაზ არველაძის განცხადებით, მთავრობის გადაწყვეტილება, "ხუდონჰესი" ინვესტორ კომპანია "ტრანს ელექტრიკასგან" სრულად შეიძინოს, პროექტის განხორციელების გაჭიანურებით არის განპირობებული. "ხუდონჰესის" მშენებლობა დროში გაიწელა. ჩვენ წლევანდელი ბალანსით, მილიარდ 700 მილიონი კვტ/სთ ელექტროენერგია იმპორტით უნდა შევისყიდოთ. 740 მლნ უკვე პირველ სამ თვეში შევისყიდეთ. ამ ელექტროსადგურის გამომუშავება მილიარდნახევარი კვტ/სთ-ია და დაახლოებით 300 მლნ კვტ/სთ-ს ენგურჰესს უმატებს ზამთარში. "ხუდონჰესის" მუშაობის პირობებში საერთოდ აღარ დაგვჭირდებოდა ელექტროენერგიის იმპორტით შესყიდვა", - განაცხადა არველაძემ.

პარლამენტარი არ გამორიცხავს, რომ ინვესტორმა საკუთარი ინტერესების დაცვის მიზნით, საერთაშორისო საარბიტრაჟო სასამართლოს მიმართოს. "როგორც თავად ამბობენ, 30 მლნ დოლარი აქვთ დახარჯული. რამდენიც არ უნდა იყოს, თუ საქმე არბიტრაჟში წავიდა, ბევრად მეტს მოითხოვენ, ვიდრე დახარჯული აქვთ. რა და როგორ იქნება, ვნახოთ", - აღნიშნა არველაძემ.

დეპუტატი ამბობს, რომ ჰესის მშენებლობაში სახელმწიფოს ჩართულობა მნიშვნელოვნად მიაჩნია. მისივე განმარტებით, საბჭოთა კავშირის დროს სვანეთის იმ მაცხოვრებლებს, რომელთა საკარმიდამო ნაკვეთებზე ხუდონჰესი უნდა აშენდეს, ორჯერ ჰქონდათ კომპენსაცია მიღებული.  "ეს სახლებიც დარჩათ და კომპენსაციაც. ახლა უკვე ახალი თაობა წამოვიდა და მათ ახალი მოთხოვნები აქვთ. ეს მოთხოვნები, რომელიც რეალური და სწორია, უნდა შეუსრულო კიდევაც", - მიიჩნევს დეპუტატი.

რაც შეეხება პროექტის გარემოზე ზემოქმედების საკითხს, რევაზ არველაძის ინფორმაციით, ამ მხრივ ჰესი ყველა საერთაშორისო სტანდარტს აკმაყოფილებს.

"ხუდონჰესის" ინვესტორთან პროექტის გამოსყიდვის თაობაზე მოლაპარაკებების შესახებ ენერგეტიკის მინისტრმა კახა კალაძემ 19 აპრილს განაცხადა. მოგვიანებით, მინისტრის მოადგილემ ირაკლი ხმალაძემ განმარტა, რომ მთავრობის მიერ ინვესტორისგან "ხუდონჰესის" გამოსყიდვის პროცესი დაახლოებით ერთ წელიწადში დასრულდება.

რა თანხის გადახდა მოუწევს მთავრობას "ხუდონჰესში" "ტრანს ელექტრიკასთვის", უცნობია. თანხას აუდიტი დაითვლის. თავად კომპანიის ტექნიკურმა დირექტორმა დავით მირცხულავამ კი „საქმის კურსთან“ რანდენიმე თვის წინ საუბრისას განაცხადა, რომ ინვესტორმა პროექტზე 30 მილიონი დოლარი უკვე დახარჯა.

რევაზ არველაძე