ნიკო მჭედლიშვილი: როცა ჩინეთს რაღაც ემუქრება ეს მსოფლიო ეკონომიკაზე გლობალურად აისახება

ჩინეთი სიდიდით მსოფლიოს მეორე ეკონომიკაა. შესაბამისად თუ ჩინეთის ეკონომიკას პრობლემა აქვს, ეს ნიშნავს რომ ნავთობზე მოთხოვნა მცირდება და შესაბამისად ფასიც ეცემა. როცა ჩინეთს რაღაც ემუქრება ეს აისახება გლობალური მასშტაბით მსოფლიო ეკონომიკაზე - ამის შესახებ ტელეკომპანია იმედის „დღის ქრონიკაში“ ბიზნესისა და ტექნოლოგიების უნივერსიტეტის ასოცირებულმა პროფესორმა ნიკოლოზ მჭედლიშვილმა განაცხადა. 

მისი თქმით 24 თებერვალს საფონდო ბირჟებზე იყო ინდექსების ვარდნა, როგორიც 2016 წლის შემოდგომიდან არ ყოფილა. „ვინც აქციებით ვაჭრობს ლონდონის, ნიუ-იორკის და შანხაის ბირჟებზე ბუნებრივია ეს იმოქმედებდა მათ ჯიბეზე და კაპიტალზე. დღეს ვითარება შედარებით მშვიდია. გუშინდელი პანიკა ჩაცხრა, დასტაბილურდა ნავთობის ფასიც“, - განაცხადა ნიკოლოზ მჭედლიშვილმა. 

მჭედლიშვილის განცხადებით ჩინეთთან ავიამიმოსვლის შეჩერება და ირანთან საზღვრის ჩაკეტვა საქართველოს ეკონომიკას ფინანსურ ზარალს მიაყენებს. „ეს ზარალი ტურიზმის სექტორისთვის არ იქნება კატასტროფული, თუმცა მნიშვნელოვანი დანაკარგი იქნება.ყველაფერი დამოკიდებულია იმაზე როგორი გავრცელების არეალი ექნება ამ ვირუსს სხვა ქვეყნებში. ჩვენ ვსაუბრობთ ირანთან საჰაერო მიმოსვლის ჩაკეტვაზე და იქიდან მიღებულ ზარალზე. კორონავირუსი ემირატებშიც გავრცელდა და თუ ფრენები ამ ქვეყანასთანაც შევაჩერეთ ცხადია იქიდანაც ზარალს უნდა ველოდოთ“, - აღნიშნა ნიკოლოზ მჭედლიშვილმა. 

მისი თქმით, 2020 წლის იანვარში ჩინეთი საქართველოს პირველი საექსპორტო ბაზარია და თუკი ჩინეთის ეკონომიკას შეექმნა სერიოზული პრობლემები ეს საქართველოზეც აისახება: „ის პროდუქცია, რომლის ექსპორტსაც ჩინეთში ვახდენდით, ეს არის სპილენძის მადნები და ღვინო, ცხადია ეს პროდუქციის საექსპორტო ნაწილზე და ტურიზმზე გავლენას მოახდენს. თუმცა დადებითი მოვლენაა ის, რომ ჩინეთში კორონავირუსის გავრცელება აღარ არის ისეთი მძაფრი“, - განაცხადა მჭედლიშვილმა.

კორონავირუსის საფრთხის შედეგად მსოფლიოს 500-მა უმდიდრესმა ადამიანმა  ერთ დღეში 139 მილიარდი დოლარი დაკარგა. ამის შესახებ bloomberg წერს.