სოსო არჩვაძე: ქართულმა სტატისტიკურმა სისტემამ ისტორიულ წარმატებას მიაღწია

ექსპერტი სოსო არჩვაძე ორგანიზაცია Open Data Watch-ის მიერ საქართველოს სტატისტიკის სისტემის ევროპის საუკეთესო ოცეულში დასახელებას საკუთარ Facebook-გვერდზე ეხმაურება.

„ქართულმა სტატისტიკურმა სისტემამ ისტორიულ წარმატებას მიაღწია - ორგანიზაცია Open Data Watch-ის შეფასებით, ჩვენი ქვეყნის სტატისტიკური სისტემა დასახელებულია ევროპის საუკეთესო ოცეულში. საქართველომ მსოფლიოში 187 ქვეყნიდან 31-ე ადგილი დაიკავა, რაც 8 პოზიციით უკეთესია წინა შეფასებასთან შედარებით და ამ ინდიკატორით იგი უსწრებს ევროკავშირის 12 ქვეყანას. სიამაყის საგანს წარმოადგენს ისიც, რომ ამ მაჩვენებლით საქართველო რეგიონში პირველ ადგილზეა“ - წერს სოსო არჩვაძე.

ექსპერტის შეფასებით, საქართველოს სტატისტიკის სისტემისთვის შედეგები უაღრესად სასიამოვნო და დამსახურებული აღიარებაა იმ თანმიმდევრული და კომპლექსური ღონისძიებებისა, რასაც საქართველოს სტატისტიკის ეროვნული სამსახური ახორციელებს მრავალი წლის განმავლობაში.

„რა თქმა უნდა, აღნიშნულ წარმატებაში უდიდესი წვლილი მიუძღვის სტატისტიკის სამსახურის ამჟამინდელ ხელმძღვანელობასა და მის მაღალპროფესიონალ კოლექტივს. ამასთან, ეს დამსახურებული აღიარება ეკუთვნის სტატისტიკის ეროვნული სამსახურის წინა თაობების წარმომადგენლებსაც, რომლებმაც სერიოზული ორგანიზაციული და მეთოდოლოგიური საფუძველი მოამზადეს ქვეყნის სტატისტიკური უწყების ამჟამინდელი საერთაშორისო აღიარებისა და დაფასებისთვის. საიდუმლო არაა, რომ ნებისმიერი მმართველობითი გადაწყვეტილების მიღებისა და შემდგომ მათი რეალიზაციის ეფექტიანობა დიდწილად დამოკიდებულია პირველადი სტატისტიკური ინფორმაციის ხარისხზე, მის ობიექტურობასა და უტყუარობაზე. ამ ასპექტით, სტატისტიკის ეროვნულ სამსახურს თავისი თვალსაჩინო წვლილი შეაქვს ჩვენი ქვეყნის განვითარებაში“ - აღნიშნავს ექსპერტი.

ორგანიზაცია Open Data Watch-მა ღია მონაცემთა აღწერის (Open Data Inventory – ODIN) რიგით მეხუთე ანგარიში გამოაქვეყნა, რომელშიც წარმოდგენილია მსოფლიოს ქვეყნების ოფიციალური სტატისტიკის სამსახურების შეფასება, სხვადასხვა კრიტერიუმების მიხედვით. ODIN-ის შეფასებით, 2020 წელს საქართველოს სტატისტიკის სისტემის საერთო შეფასებამ 69 ქულა შეადგინა. ამასთან, ქვეყნის რეიტინგი, წინა შეფასებასთან შედარებით, 8 პოზიციით გაუმჯობესდა და საქართველომ მსოფლიოს ქვეყნებს შორის, 39-დან 31-ე ადგილზე გადაინაცვლა.

ანგარიშის მიხედვით, საქართველო რეიტინგით უსწრებს ევროკავშირის 12 ქვეყანას (იტალია, საფრანგეთი, ბელგია, პორტუგალია, რუმინეთი, უნგრეთი, ლუქსემბურგი, ხორვატია, კვიპროსი, საბერძნეთი, ლატვია, მალტა) და ისტორიაში პირველად, ევროპის საუკეთესო ქვეყნების ოცეულში დასახელდა. ამავე ანგარიშის თანახმად, საქართველო ასევე უსწრებს ისეთ განვითარებულ ქვეყნებს, როგორიცაა იაპონია, გაერთიანებული სამეფო, ჩინეთი და ინდონეზია. ამასთან, ODIN-ის შეფასებით, საქართველოს სტატისტიკის სისტემა რეიტინგით ისეთი ქვეყნების დონეზეა, როგორიცაა - ავსტრია, შვეიცარია და მექსიკა.

ODIN-ის 2020 წლის ანგარიში, რომელშიც შესულია მონაცემები საქართველოს შესახებ, რამდენიმე კვირის წინ გამოქვეყნდა. ანგარიშის სრული ვერსია იხილეთ ბმულზე.