რა აქტივები აქვს რუსულ ბიზნესს ბრიტანეთში და რა საფრთხე ემუქრება მათ

რა რისკები არსებობს რუსებისთვის, რომლებსაც აქტივები დიდ ბრიტანეთში აქვთ? ექსპერტების თქმით, ეს უახლოეს დღეებში, დიდი ბრიტანეთის ხელისუფლების ნაბიჯების მიხედვით გამოჩნდება. თუმცა ფაქტია, რომ ლონდონს და მოსკოვს შორის ახალი პოლიტიკური კრიზისი რუსულ-ბრიტანულ ბიზნეს-კავშირებს კვლავ სერიოზულ საფრთხეს უქმნის. ამის შესახებ BBC-ს რუსული გამოცემა წერს.

14 მარტს, დიდი ბრიტანეთის პრემიერმინისტრმა ტერეზა მეიმ ის ზომები გამოაცხადა, რომლითაც მისმა მთავრობამ სოლსბერიში ყოფილი რუსი ჯაშუშის სერგეი სკრიპალის და მისი ქალიშვილის მოწამვლას უპასუხა. მეიმ რუსეთი დიდი ბრიტანეთის ტერიტორიაზე ძალის უკანონო გამოყენებაში დაადანაშაულა. პასუხად ლონდონი ქვეყნიდან 23 რუს დიპლომატს გააძევებს; ბრიტანეთის მთავრობის და სამეფო ოჯახის წევრები არ დაესწრებიან რუსეთში დაგეგმილ ფეხბურთის მსოფლიო ჩემპიონატს; რუსეთის საგარეო საქმეთა მინისტრი სერგეი ლავროვი ვერ ჩავა ვიზიტით დიდ ბრიტანეთში. ექსპერტები არ გამორიცხავენ იმასაც, რომ ლონდონი რუსულ სახელმწიფო კომპანიებს აქტივებს გაუყინავს.

რუსული ბიზნესი ბრიტანეთში

Forbes-ის რუსულ სიაში მეხუთე ადგილზე მყოფი ალიშერ უსმანოვი, საფეხბურთო კლუბის "არსენალის" თანამფლობელია; ამავე სიის მე-12 ნომერი რომან აბრამოვიჩი - საფეხბურთო კლუბის "ჩელსის" მფლობელი. აბრამოვიჩი არის ასევე მეტალურგიული კომპანია "ევრაზის" უმსხვილესი აქციონერი, რომლის შტაბ-ბინაც ლონდონშია. კიდევ ერთმა რუსმა ბიზნესმენმა მიხეილ ფრიდმანმა 2017 წელს ჯანსაღი კვების ბრიტანული ქსელი Holland&Barret-ი იყიდა.

ბრიტანეთში ოფისები აქვთ რუსულ სახელმწიფო კომპანიებსაც. მაგალითად, "გაზპრომის" ოფისი მანჩესტერშია, 1999 წლიდან კი ლონდონში კომპანიის ტრეიდინგული განყოფილება მუშაობს. 2017 წლის აპრილში, რუსული პრესა "გაზპრომის" მენეჯერებზე დაყრდნობით წერდა, რომ ლონდონის ოფისი გაზის გიგანტის დეფაქტო ევროპულ შტაბ-ბინად იქცა და კომპანია "ნერვიულობდა" "ბრექსიტის" შედეგების გამო თუ ეს ოფისი ლონდონში დარჩებოდა.      

დილიდან, ლონდონის ბირჟაზე უმსხვილესი რუსული კომპანიების ფასიან ქაღალდებზე მოთხოვნა მცირდება. ამ კომპანიებს შორისაა "გაზპრომი", "გაზპრომ ნეფტი", "ტატნეფტი", "როსნეფტი", "ლუკოილი", "ვითიბი" და "სბერბანკი", რიტეილერები "ლენტა", "მაგნიტი" და X5 Retail Group-ი, "აკრონი", "ნორილსკი ნიკელი" და სხვები. ექსპერტების თქმით, ქაღალდებზე ფასების შემცირების მიზეზი მათზე მოთხოვნის შემცირებაა. თავად კომპანიები ფასის შემცირების შესაძლო ფაქტორებად გეოპოლიტიკურ რისკებს ასახელებენ.

2014 წლამდე ლონდონის ბირჟა რუსული კომანიების ქაღალდების განთავსებისთვის ყველაზე პოპულარული ადგილი იყო. ყირიმის ანექსიის შემდეგ რუსული კომპანიები კაპიტალის დასავლურ ბაზრებს ფაქტობრივად მოწყდნენ. 2017 წელს რუსებმა ბირჟაზე დაბრუნება დაიწყეს (ოლეგ დერიპასკას IPO En+).

ცვლილებებია რუსეთის ბირჟებზეც

მოსკოვის ბირჟის ინდექსმა დღე ვარდნით დაიწყო, რაც გაძლიერდა ტერეზა მეის გამოსვლის შემდეგ. მოსკოვის დროით 16:35 საათზე, მოსკოვის ბირჟის ინდექსი 1,1%-ით, ხოლო РТС-ის - 1,6%-ით შემცირდა. თუმცა ექსპერტები ამბობენ, რომ კორექცია დროებითია და ვარდნაც მცირეა, რადგან განსხვავებით სხვა ქვეყნების ბაზრებისაგან წლის დასაწყისიდან რუსული ბაზარი 10%-ზე მეტით გაიზარდა. სპეციალისტების აზრით, რუსულ აქტივებზე მოთხოვნა ამერიკული ბაზრის ზრდასთან ერთად გაიზრდება, თუ სიტუაცია მკვეთრად ცუდი სცენარით არ განვითარდა.

რაც შეეხება დიდ ბრიტანეთს, იმ შემთხვევაშიც თუ რუსული კომპანიების მიმართ სანქციებს ოფიციალურად არ შემოიღებენ, რუსული კომპანიები და ბიზნესმენები მაინც დაზარალდებიან, რადგან უფრო იოლი იქნება რუსებთან საქმის არდაჭერა, ვიდრე დიდი ბრიტანეთის რეგულატორისთვის იმის დამტკიცება, რომ თანამშრომლობა გამორჩეულია და გამონაკლისს წარმოადგენს.