ქუთაისის აეროპორტი მგზავრების რიცხვის ზრდით ევროპაში ერთ-ერთი ლიდერია

ქუთაისის აეროპორტი მგზავრთნაკადის ზრდით ევროპაში ერთ-ერთი ლიდერია. ACI EUROPE-ის მონაცემებით, 2018 წლის ნოემბერში აეროპორტი, წინა წლის ნოემბერთან შედარებით, 132.5 პროცენტით მეტ მგზავრს მოემსახურა.

უფრო მაღალი ზრდა დაფიქსირდა მხოლოდ იტალიის შემდეგ ქალაქებში: ტრაპანი (+553.3%), ფოჯა (+550%), ტარანტო (+366.7%) და ბერძნულ მიკონოსში (+252.4%).

მაღალი ზრდის მქონე აეროპორტებს შორის არის დასახელებული თბილისის საერთაშორისო აეროპორტიც, სადაც მგზვართნაკადი ნოემბერში 19.4 პროცენტით გაიზარდა. უფრო მაღალი ზრდა დაფიქსირდა შემდეგ ქალაქებში: კიევი ( +33%), პრიშტინა (29,8%), მოსკოვი (შერემეტევო) + 19,5%-ი. 

2018 წლის განმავლობაში, საქართველოს აეროპორტები ჯამში 5 033 323 მგზავრს მოემსახურა. 2017 წელთან შედარებით, მგზავრთნაკადი 23.55%-ით, ხოლო 2016 წელთან შედარებით 77.20%-ით არის გაზრდილი.

სამოქალაქო ავიაციის სააგენტოს ინფორმაციით, გასულ წელს თბილისის საერთაშორისო აეროპორტი 3 808 619 მგზავრს მოემსახურა, რაც 20.37%-ით მეტია, ვიდრე 2017 წლის მონაცემებით გადაყვანილი მგზავრების რაოდენობა.

2018 წელს ბათუმის საერთაშორისო აეროპორტის მეშვეობით 598 891 მგზავრი იქნა გადაყვანილი, რაც 20.83% ით (103 223 მგზავრით) მეტია 2017 წლის მაჩვენებელზე, ხოლო ქუთაისის საერთაშორისო აეროპორტში მგზავრთნაკადი 52.37%-ით გაიზარდა.

ამასთან, 2018 წლის განმავლობაში, საქართველოს აეროპორტებში, 2017 წელთან შედარებით, 3 557-ით მეტი რეისი განხორციელდა.