სავალუტო ფონდი: „თიბისი ბანკის“ სტაბილურობის შესახებ კითხვები არ არსებობს

„თიბისი ბანკის“ საქმეს საქართველოში საერთაშორისო სავალუტო ფონდის წარმომადგენლობის ხელმძღვანელი ფრანსუა პეჰშო ეხმიანება.

"მაშინ, როცა ზუსტი დეტალები ჩვენთვის უცნობია, მიგვაჩნია, რომ ეროვნული ბანკი, როგორც საქართველოს საფინანსო სექტორის ზედამხედველი, თავის საქმეს აკეთებს თავისი პასუხისმგებლობების გათვალისწინებით. ღინისძიების არ გატარება მაშინ, როცა არსებობს ამ ღონისძიების გატარების იურიდიული საფუძველი, დააზიანებდა ეროვნული ბანკის, როგორც საფინანსო სექტორის ეფექტიანი ზედამხედველის მიმართ სანდოობას და საფინანსო სექტორის ზედამხედველობის პრაქტიკას. და ბოლოს, აღვნიშნავ, რომ „თიბისი ბანკი“ არის ფინანსურად ძლიერი და კაპიტალით კარგად უზრუნველყოფილი. რამდენადაც ვიცით, ამჟამად ბანკის ფინანსურ მაჩვენებლებთან და სტაბილურობასთან დაკავშირებით არანაირი კითხვა არ არსებობს", – განაცხადა ფრანსუა პეჰშომ.

ეროვნულმა ბანკმა ათვლა დაიწყო. ორ თვეში "თიბისი ბანკის" აქციონერთა კრებამ მამუკა ხაზარაძე და ბადრი ჯაფარიძე სამეთვალყურეო საბჭოდან უნდა გაიწვიოს. ხაზარაძე აცხადებს, რომ უსამართლობას არ შეეგუება. ხელისუფლების წარმომადგენლები კი სამართლებრივ პროცედურებსა და პროკურატურაში დაწყებულ გამოძიებაზე მიუთითებენ.

,,ჩემი პირადი შეფასებით, აქ დიდი სამართლებრივი კომპონენტია. იმედი მაქვს, რომ ჩვენი სამართალდამცავი უწყებები, პროკურატურა დეტალურად გაერკვევიან ამ საკითხში. ეს არის მათი პრეროგატივა“, - განაცხადა ეკონომიკის მინისტრმა გიორგი ქობულიამ „თიბისი ბანკთან“ დაკავშირებულ გამოძიებაზე. 

საქართველოს საბანკო ასოციაციამ „თიბისის“ მხარდაჭერა გამოუხადა. 

ეროვნულმა ბანკმა, საფინანსო სექტორის ზედამხედველობის კომიტეტის 2019 წლის 13 თებერვლის სხდომაზე განხილვის შედეგად, მიიღო გადაწყვეტილება თიბისი ბანკის სამეთვალყურეო საბჭოს თავმჯდომარისა და მისი მოადგილისთვის ხელმოწერის უფლების შეჩერების თაობაზე. ამასთანავე, თიბისი ბანკის აქციონერთა კრებას მიეცა 2-თვიანი ვადა მათი სამეთვალყურეო საბჭოდან გაწვევისთვის. 

გენერალური პროკურატურის ინფორმაციით, „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. ამ საქმეზე უწყებაში ბრიფინგი გაიმართა. ამავე ცნობით, საქმეზე დაიკითხა თითქმის ყველა პირი. დაკითხულია მამუკა ხაზარაძე და ბადრი ჯაფარიძე, ასევე ავთანდილ წერეთელი.

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც   ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.