დეპუტატები „თიბისის“ დამფუძნებლებისგან კონკრეტულ ინფორმაციას ელიან

"თიბისის" დამფუძნებლებსა და ეროვნული ბანკის პრეზიდენტს დარგობრივი კომიტეტის სხდომაზე მოუსმენენ. შეხვედრამდე ერთი დღით ადრე დეპუტატები ამბობენ, რომ მამუკა ხაზარაძის, ბადრი ჯაფარიძისა და კობა გვენეტაძისგან კონკრეტულ ინფორმაციას ელიან, ოპოზიცია სამართლებრივი საქმის უკან პოლიტიკური მოტივის არსებობას არ გამორიცხავს. 

საქართველოში ევროკავშირის ელჩის კარლ ჰარცელის განცხადებით, "თიბისი ბანკის" საქმეს ევროკავშირის წევრი ქვეყნები ყურადღებით აკვირდებიან. მისი განცხადებით, აუცილებელია, რომ პროცესი გასაგებად და გამჭვირვალედ წარიმართოს.

"თიბისი ბანკმა" ეროვნული ბანკის წინააღმდეგ სასამართლო დავა შეწყვიტა და განაცხადა, რომ გადაიხდის ეროვნული ბანკის მიერ ჯარიმის სახით დაკისრებულ 1 მილიონ ლარს. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.