ხაზარაძის საქმის ერთ-ერთი ფიგურანტი $17 მილიონის ტრანზაქციაზე ვერაფერს იხსენებს

პაატა ღაძაძე, რომელიც მამუკა ხაზარაძის საქმის ერთ-ერთი ფიგურანტია, "იმედთან" სატელეფონო საუბარში ამბობს, რომ 10 წლის წინანდელ ტრანზაქციასთან დაკავშირებით არაფერი ახსოვს. 

კითხვაზე "სად წავიდა "სამგორი თრედსა" და "სამგორი M"-ზე ბანკის მიერ სესხის სახით გაცემული თანხა", ღაძაძე პასუხობს:

"ვერაფერს ვერ გეტყვით, ეს ათი წლის წინანდელი ტრანზაქციაა, არაფერი მახსოვს". პაატა ღაძაძე "იმედთან" იმასაც ამბობს, რომ თიბისი ბანკის საქმესთან დაკავშირებით პროკურატურაში გამოკითხვაზე არ ყოფილა.

დღეს გენერალურმა პროკურატურამ მამუკა ხაზარაძის საქმესთან დაკავშირებით ბრიფინგი გამართა, რომელზეც პროკურატურამ საქმის დეტალების შესახებ გააკეთა განცხადება. პროკურატურის ცნობით, ამ საქმეში საგულისხმოა ის ფაქტი, რომ ოფშორული კომპანიის მინდობილი პირი საქართველოს მოქალაქე პაატა ღაძაძე წარმოადგენდა, რომელიც ,,სამგორი M’’-ზე და „სამგორი თრეიდ“-ზე სესხების გაცემისას „თიბისი ბანკის“ საკრედიტო კომიტეტის წევრი იყო, ხოლო მათი ოფშორში რეგისტრირებული კომპანიით ჩანაცვლებისას იკავებდა ,,თიბისი ბანკის“ ერთ-ერთ მაღალ მენეჯერულ პოზიციას.

"ხაზარაძესთან დაახლოებული ბიზნესმენის ხსენებულ კომპანიებსა და ოფშორულ კომპანიას შორის ჩართულ შუამავალ კომპანიასთან მომსახურების გაწევაზე მიღება-ჩაბარების აქტი გაფორმდა 2012 წლის 28 სექტემბერს. 

ამავდროულად გასათვალისწინებელია ის ფაქტი, რომ  „სამგორი თრეიდს“ და შპს „სამგორი M”-ს სესხები ისე ჩამოეწერა, რომ ამ კომპანიებს  სესხის მომსახურებისთვის თანხა საერთოდ არ გადაუხდიათ და აღნიშნული სესხები ბანკს დღემდე არ დაბრუნებია", - წერია განცხადებაში.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.