ლუგარის ლაბორატორიის კვლევით ინფექციურ საავადმყოფოში მყოფ პაციენტებს კორონავირუსი არ აქვთ

თბილისის ინფექციური საავადმყოფოს ბოქსირებულ განყოფილებაში მყოფი 4 პაციენტის მდგომარეობა დამაკმაყოფილებელია და მათ არაფერი აწუხებთ.

ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ პრესკონფერენციაზე განაცხადა. ამირან გამყრელიძის ინფორმაციით, ჩინეთის ორ მოქალაქეს H1N1 გრიპი დაუდგინდა. დანარჩენ ორს კი ვირუსი საერთოდ არ აღმოაჩნდა.

მისი განმარტებით, ლუგარის ლაბორატორიაში ჩატარებული კვლევებით, ამ მოქალაქეებს კორონავირუსი არ აღმოაჩნდათ, თუმცა საბოლოო პასუხის მიღების მიზნით, მონაცემები საზღვარგარეთ გაიგზავნება. 

ამირან გამყრელიძემ კიდევ ერთხელ განმარტა, რომ პანიკის საფუძველი არ არსებობს.

„ლუგარში ორჯერ ჩატარდა ტესტი, რათა დავრწმუნებულიყავით საბოლოო შედეგში. ჩვენ ვადგენთ 22 ვირუსზე რეაქციას, მათ შორის, ხუთი კორონავირუსის ტიპზე. ასევე მერსიკოვზე, ეს გახლდათ კორონავირუსი, რომელმაც  2012 წელს, შუა აღამოსავლეთში ეპიდაფეთქება გამოიწვია. დილის მონაცემებით დადასტურდა, რომ არც ერთ ვირუსზე დადებითი რეაქცია არ იყო. ჩვენ დღეს არ გვაქვს სუბტიპი კორონავირუსის, რომელიც დღესდღეობით ტრიალებს ჩინეთში, ამის გამო, პაციენტების მონაცემები მაინც გაიგზავნა როტერდამში,  რათა საბოლოოდ დავრწმუნდეთ, რომ კორონავირუსის იმ სუბტიპთან საქმე არ გვაქვს.  იმედი გვაქვს, რომ კორონავირუსის სუბტიპი სამშაბათს-ოთხშაბათს უკვე გვექნება“, - განაცხადა ამირან გამყრელიძემ.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ბოლო მონაცემებით, კორონავირუსმა ჩინეთში 213 ადამიანი იმსხვერპლა. ინფიცირებულთა რაოდენობამ 9690-ს გადააჭარბა, სრულად კი მხოლოდ 171 ადამიანი განიკურნა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ: ტაილანდში, აშშ-ში, სინგაპურში, ჰონგ-კონგში, ნეპალში, ავსტრალიაში, ტაივანზე, მალაიზიაში, იაპონიაში, ტიბეტში, საფრანგეთში, სამხრეთ კორეაში, ინდოეთში, ფილიპინებზე, ვიეტნამსა და კანადაში.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.