ხუნდაძე კორონავირუსზე: საქართველო დაბალი საფრთხის შემცველ ქვეყნად ითვლება

ჯანდაცვის კომიტეტის თავმჯდომარე ჯანმრთელობის მსოფლიო ორგანიზაციის სპეციალურ მისიას ხვდება. დიმიტრი ხუნდაძის თქმით, შეხვედრაზე მთავარი განსახილველი საკითხი კორონავირუსის გარშემო შექმნილი სიტუაცია იქნება.

„190 ქვეყანას შორის, რომელიც ძირითადად ხელმძღვანელობს ჯანდაცვის მსოფლიო ორგანიზაციის რეკომენდაციებით, ჩვენ მკაცრად ვასრულებთ ამ რეკომენდაციებს, განსაკუთრებით ისეთ გლობალურ გამოწვევებზე როგორიცაა კორონავირუსი, თუმცა საქართველო ითვლება დაბალი საფრთხის შემცველ ქვეყნად, ანუ მწვანე ზონაში ვიმყოფებით, მაგრამ თეორიული რისკები არსებობს და აქედან გამომდინარე პრევენციული ღონისძიებები არის უმკაცრესი.

ჯანდაცვის მსოფლიო ორგანიზაციასთან შეთანხმებით ვაკეთებთ ყველაფერს, რომ არ მოხდეს დაინფიცირებული მოქალაქეების შემოსვლა ქვეყანაში, მაგრამ თუ ის დაფიქსირდა, მე ვუშვებ მხოლოდ თეორიულ შანსს, რა თქმა უნდა ქვეყანა მზადაა ამისათვის, შესაბამისი ადამიანი რესურსით, კლინიკებით და მედიკამენტებით მზადყოფნაშია. ის მოქალაქეები, რომლებიც შემოდიან თუნდაც ტრანზიტული გზით მაღალი რისკის ზონიდან, შემოწმებას გადიან, არსებობს პრევენციის ღრმა კვლევის მეთოდები, ამის ყველა საშუალება არსებობს ქვეყანაში. ჩვენ საერთაშორისო სტანდარტებს დაქვემდებარებულ რეკომენდაციებს ვასრულებთ.

ეჭვი იყო რამდენიმე მოქალაქეზე, გაკეთდა პირველადი ტესტები, მოხდა მისი შესწავლა ლაბორატორიულადაც. ძირითადად A ტიპის ვირუსი დაფიქსირდა, რამდენიმე მოქალაქე მონიტორინგის ქვეშ რჩება. არ არის მოლოდინი, რომ კორონავირუსი იქნება დაფიქსირებული, მაგრამ ჩვენ თეორიულ რისკებსაც ვაზღვევთ, ამიტომ პრევენციული ღონისძიებები არის ძალიან მაღალი. აეროპორტში ხდება თერმული სკანირება, ყველა მოქალაქის გამოკითხვა. იქ არის რეკომენდაციები სამ ენაზე, რომ ყველა იყოს ინფორმირებული“, - განაცხადა ხუნდაძემ.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ბოლო მონაცემებით, კორონავირუსმა ჩინეთში 213 ადამიანი იმსხვერპლა. ინფიცირებულთა რაოდენობამ 9690-ს გადააჭარბა, სრულად კი მხოლოდ 171 ადამიანი განიკურნა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ: ტაილანდში, აშშ-ში, სინგაპურში, ჰონგ-კონგში, ნეპალში, ავსტრალიაში, ტაივანზე, მალაიზიაში, იაპონიაში, ტიბეტში, საფრანგეთში, სამხრეთ კორეაში, ინდოეთში, ფილიპინებზე, ვიეტნამსა და კანადაში.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.