თენგიზ ცერცვაძე: ახალი შემთხვევებიდან ხუთს ტესტირება ერთი კვირის წინ ჩაუტარდა და მაშინ კორონავირუსი არ დაუდასტურდათ

ახალ ინფიცირებულებულთაგან 5-ს კორონავირუსზე ტესტირება ერთი კვირის წინაც ჩაუტარდა, თუმცა მაშინ პასუხი ნეგატიური იყო, - ამის შესახებ ინფექციური საავადმყოფოს დირექტორმა, თენგიზ ცერცვაძემ ჟურნალისტებს განუცხადა.

„5 ადამიანი იმყოფებოდა თვითიზოლაციაში და არიან იმ ჯგუფის წარმომადგენლები, რომლის ერთი წარმომადგენელი ჩვენთან წევს უკვე მეშვიდე თუ მერვე დღეა და რომელიც მაშინ დადასტურდა, 7 დღის წინ. ესენი მაშინ იყვნენ გამოკვლეულები და მაშინ არ დადასტურებულა. იმყოფებოდნენ თვითიზოლაციაში და ახლა დაუდასტურდათ. ანუ ჩვენ ახლა გვაქვს ორი ჯგუფი, რომლებმაც სხვადასხვა დროს იმოგზაურეს იტალიაში. ერთი ჯგუფია ის ახალგაზრდა ქალი რომელიც ჩვენთან წევს და ის 5 ადამიანი, და კიდევ ის 6 კაცი, ვინც პაციენტ #4-თან იმყოფებოდა“, - განაცხადა ცერცვაძემ.

მისივე თქმით, საქართველოში დაფიქსირდა კორონავირუსის შიდა გადაცემის 4-5 შემთხვევაა, დანარჩენები კი ქვეყნის საზღვრებს გარეთ დაინფიცირდნენ. „კარგი ის არის, რომ ჯერ ინფექციის შიდა გადაცემები არის მინიმალური, სულ 4-5 შემთხვევაა 23 დაინფიცირებულიდან, ყველა დანარჩენი დაინფიცირდა ქვეყნის გარეთ“, - განაცხადა თენგიზ ცერცვაძემ.

საქართველოში კორონავირუსით ინფიცირებულთა რიცხვი 23-მდე გაიზარდა. კარანტინის რეჟიმში ამ დროისთვის 126 ადამიანი იმყოფება, სტაციონარში მეთვალყურეობის ქვეშ კი 46 პაციენტი რჩება.

საქართველოში კორონავირუსით ინფიცირების პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

2020 წლის 30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. 9 მარტს კი, ჯანმოს დირექტორმა ტედროს ადჰანომ გებრეიესუსიმ განაცხადა, რომ ახალი კორონავირუსის პანდემიის საფრთხე რეალური გახდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.