ამირან გამყრელიძე: მოვუწოდებ მოქალაქეებს, ბათუმის ბულვარში განთავსებულ კარვებში მივიდნენ და გამოკვლევა ჩაიტარონ

ბათუმის ბულვარში განთავსებულ კარვებთან მიმდინარე ტესტირების პროცესს დაავადებათა კონტროლის ცენტრის დირექტორი ამირან გამყრელიძე და ჯანდაცვის მინისტრის მოადგილე თამარ გაბუნია გაეცნენ. მათ ისაუბრეს საველე კარვების მნიშვნელობაზე და მოუწოდეს ადგილობრივებს, ვისაც შეხება ქონდათ კორონავირუსით ინფიცირებულ პირებთან, ან აქვთ სიმპტომები დროულად ჩააბარონ ანალიზები.

გამყრელიძის თქმით, 6 დღის განმავლობაში კარვებსა და რამდენიმე პოლიკლინიკაში სულ 8000-მდე ბიოლოგიური ნიმუში არის აღებული, საიდანაც covid19-ის რვა შემთხვევა იდენტიფიცირებულია.

„ბათუმის ბულვარის ტერიტორიაზე სამი კარავი დგას. მადლობა მინდა გადავუხადო წითელ ჯვარს მხარდაჭერისა და დახმარებისთვის. მათი პერსონალი ემსახურება, არეგულირებს რიგებს და ეხმარება მოქალაქეებს. ძალიან კარგადაა დაცული დისტანცია. არ უწევთ დიდი ხანი რიგში დგომა მოქალაქეებს. ამასთანავე, სწრაფად ხდება ლაბორატორიაში ნიმუშების ტრანსპორტირება.

ჩვენ ახლა კოლონადებთან დადგმულ ერთ-ერთ კარავს ვესტუმრეთ. დღეს უკვე 200- მდე ნიმუშია აღებული. 5-6 დღის განმავლობაში კარვებსა და რამდენიმე პოლიკლინიკაში სულ 8000-მდე ბიოლოგიური ნიმუშია აღებული, საიდანაც რვა შემთხვევა იდენტიფიცირებულია დადებითად. აქ მოდიან ადამიანები, ვისაც უკვე ჰქონდა დადასტურებულ შემთხვევებთან კონტაქტი და იტარებენ ტესტირებას. რაც მეტი ადამიანი მოვა და ჩაიტარებს გამოკვლევებს, კარგი იქნება, რადგან უსიმპტომო შემთხვევებს ადრეულ ეტაპზე გამოვავლენთ. დაიწყება მათი მონიტორინგი, რადგან უსიმპტომოებს არ სჭირდებათ მკურნალობა. უფრო მალე აღმოვფხვრით ამ მცირე ეპიდაფეთქებას, რაც ბათუმში „დონას“ კლასტერთან დაკავშირებით ჩამოგვიყალიბდა. დღეს დილით გამოცხადებული 25 შემთხვევა პირდაპირ თუ არაპირდაპირ უკავშირდება „დონას" კლასტერს, მაგრამ დარწმუნებული უნდა ვიყოთ, რომ ეს ეპიდაფეთქება მალე ჩაქრება და ჩვეულებრივი ცხოვრება გაგრძელდება. ცოტა ხანი უნდა გავიჭირვოთ. კარგია, რომ ადამიანების მასობრივი ტესტირება მიმდინარეობს. მოვუწოდებ მოქალაქეებს, მოვიდნენ და გამოკვლევა ჩაიტარონ. ეს გაგრძელდება კარგახანს და სასურველია რომ მაქსიმალურად მოვიწვიოთ მოსახლეობა“,- განაცხადა ამირან გამყრელიძემ.

დღეს საქართველოში კორონავირუსის 25 ახალი შემთხვევა გამოვლინდა, გამოჯანმრთელდა 8 პაციენტი. ამ დროისთვის საქართველოში კორონავირუსის 1 621 შემთხვევაა დადასტურებული. განკურნებულთა რაოდენობა კი 1 302-ს შეადგენს.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.