მარინა ეზუგბაია: იმერეთსა და სამეგრელოში მკვეთრი მატება არ არის, ყველაზე საყურადღებო ახლა აჭარაა. სიტუაცია კონტროლირებადია თბილისშიც

საქართველოში, კოვიდცენტრებსა და მკურნალობისთვის განკუთვნილ სასტუმროებში, ჯამში 831 კოვიდინფიცირებული მკურნალობს. მათგან კრიტიკულად მძიმედ ოთხი პაციენტი, 25 ადამიანი კი მძიმე მდგომარეობაშია.

ინფექციურის სამედიცინო დირექტორის, განმარტებით, კოვიდინფექციას თავისი სახე არ შეუცვლია, დაავადების გამოვლენის ყველა ფორმა არსებობს - ასიმპტომური, ასევე, მსუბუქად დაწყებული, რომელიც ასეთივე ფორმით მთავრდება. იყო ასევე შემთხვევები, როდესაც პაციენტების მკურნალობა 40 დღემდე გახანგრძლივდა, რადგან საქმე გვქონდა ე.წ მკვდარი ვირუსის ნარჩენებთან, ასეთი ფაქტები დიაგნოსტირდება, თუმცა ის უკვე აღარ წარმოადგენს საშიშროებას გარშემო მყოფთათვის. თუმცა ქვეყანაში მაინც მიღებულია გადაწყვეტილება, რომ ასეთი პაციენტები 7-დან 14 დღემდე თვითიზოლაციაშიც დარჩნენ, გააჩნია სიტუაციას.

„არის შემთხვევები, როცა დაავადება პირდაპირ მძიმედ იწყება, ეს გამოიხატება სუნთქვის უკმარისობით, პნევმონიით, ან მის გარეშეც. საგულისხმოა, რომ დაავადების პროგრესირება ნებისმიერ დროს შეიძლება, იქნება ეს ასიმპტომური, მსუბუქი თუ საშუალო სიმძიმის - ყველამ შეიძლება განიცადოს პროგრესი, დაავადების პირველი ათი დღის განმავლობაში, და ასე შესაძლოა, კრიტიკულ ფორმამდე მივიდეთ, - განმარტავს მარინა ეზუგბაია.

მისი კომენტარიდან ასევე გახდა ცნობილი, რომ ინფიცირებულ არასრულწლოვნებში დაავადება ძალიან მსუბუქად გამოიხატება, ან სიმპტომები არ აქვთ.

საქართველოში, გუშინდელ მონაცემზე ნაკლები ინფიცირებული გამოვლინდა, რაც მარინა ეზუგბაიას თქმით, სიტუაციის სტაბილიზაციაზე მიანიშნებს.

„152 შემთხვევა ძალიან აქტიური კვლევების ჩატარების შემდეგ გამოვლინდა, რაც იმის საწინდარია, რომ გარკვეულწილად, ყველა გამოვლენილი შემთხვევა გავრცელების პრევენციის საფუძველია. თუ ეს ორი-სამი დღე, დინამიკაში მატება არ გვექნება და შევინარჩუნებთ ამ მაჩვენებელს, ეს ნიშნავს რომ ქვეყანაში ჩატარებული თანაზომადი სამუშაო მყისიერი და ეფექტურია; გარკვეულწილად, გავრცელების პრევენციას მოვახერხებთ ყველა გამოვლენილის იზოლაციით“, - აღნიშნა მარინა ეზუგბაიამ.

თბილისში, ინფექციურში, სულ 28 კოვიდინფიცირებულია.

კლინიკის სამედიცინო დირექტორმა ჟურნალისტებს განუცხადა, რომ მათგან ერთი კრიტიკულად მძიმეა, სამის მდგომარეობა კი მძიმედ ფასდება.

რაც შეეხება ზოგად ვითარებას, მარინა ეზუგბაიას თქმით, ყველაზე საყურადღებო ახლა აჭარაა, აქ გამოვლენი რაოდენობა არის ყველა შემთხვევის დიაგნოსტირების, იზოლაციის და დაავადების პრევენციისთვის აუცილებელი საფუძველი. ამიტომ, ეს ციფრი არ უნდა გვაშინებდეს.

„თუ პოტენციურად ყველა გამავრცელებელი გამოვლინდება, ეს გვაძლევს საშუალებას ვიფიქროთ, რომ დაავადება მკვეთრად შემცირდება ამ რეგიონში. ნელ-ნელა, იმერეთის რეგიონში აღარ იმატებს შემთხვევები, სამეგრელოში მკვეთრი მატება არ არის, თბილისშიც არ გვაქვს მკვეთრი მატება და კონტროლირებადია სიტუაცია“, - აღნიშნა სპეციალისტმა.

მისივე თქმით, სამნიშნა მონაცემზე გადასვლა არასასიამოვნოა, თუმცა საგანგაშო არ არის.

საქართველოში კორონავირუსის 152 ახალი შემთხვევა გამოვლინდა, 6 პაციენტი კი გამოჯანმრთელდა.

90 აჭარაში დაფიქსირდა, 15 - ქუთაისში, 15 - ეგურჰესის შემთხვევაა, 17 - დაავადებულთან კონტაქტით გამოვლენილი. 4 არის შემოტანილი, 11-ზე ეპიდკვლევა გრძელდება.

გამოჯანმრთელებულთა პროცენტული მაჩვენებელი 65 %-ს შეადგენს.

ამ დროისთვის საქართველოში კორონავირუსის 2227 შემთხვევაა დადასტურებული. განკურნებულთა რაოდენობა კი 1 369-ს შეადგენს. კორონავირუსის შედეგად ქვეყანაში 19 პაციენტი გარდაიცვალა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.