დიმიტრი ხუნდაძე: ამ ეტაპზე პროცესის მართვა შეგვიძლია, თუმცა ამან არ უნდა გაგვათამამოს

თუ ადრე გარკვეულ კითხვებზე პასუხი არ გვქონდა და პირველი დღეების განმავლობაში უფრო ცუდის მოლოდინში ვიყავით, დღეს თუნდაც გაზრდილი ინფიცირების ფონზე პროცესის მართვა შეგვიძლია და ეს იმედისმომცემია. თუმცა ამან არ უნდა გაგვათამამოს, რაც მოხდა აჭარაში და ამან მყისიერად მოგვცა ნეგატიური შედეგი, - ამის შესახებ ტელეკომპანია „იმედის“ გადაცემაში „დღის ქრონიკა“ ჯანდაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ განაცხადა.

„სამწუხაროდ, ისევ გვიწევს ეპიდგაუარესებულ ვითარებაში ცხოვრება და პანდემიის რეჟიმში ყოფნა. მსოფლიოშიც და ჩვენს სამეზობლოშიც ვითარება თანდათან იძაბება, მეზობელ ქვეყნებს შორის განსაკუთრებით რთული სიტუაციაა რუსეთში. რაც შეეხება საქართველოს, ჩვენ საკმაოდ წარმატებულად გავიარეთ საწყისი ფაზები, დავრჩით მწვანე ზონაში და ახლაც, თუ აჭარას არ გავითვალისწინებთ, კვლავ მწვანე ზონაში ვართ, თუმცა აქვე მინდა ვთქვა, რომ ეს საყურადღებოა, მაგრამ არა საგანგაშო. კიდევ უფრო მაღალ ხარისხში მოგვიწევს ჯანმოსა და ადგილობრივი სპეციალისტების რეკომენდაციების შესრულება და ამ პროცესის მართვა შესაძლებელია, მაგრამ მხოლოდ რეკომენდაციის სისწორე და დროულობა საკმარისი არაა. საზოგადოების დამყოლობასაც ძალიან დიდი მნიშვნელობა აქვს. აჭარაშიც მდგომარეობა სწორედ იმიტომ გაუარესდა, რომ რეკომენდაციები არ იყო შესრულებული და მაღალი მობილობის პირობებში ეს მოსალოდნელიც იყო. გლობალურად ყველა სახელმწიფო ემზადებოდა შესაძლო მეორე ტალღისთვის და, შესაბამისად, ვემზადებოდით ჩვენც. გარდა იმისა, რომ აქამდე სხვებთან შედარებით გავრცელების ძალიან დაბალი ხარისხი და გარდაცვალების დაბალი მაჩვენებელი გვქონდა, ეს დრო ჩვენ მოვიგეთ, რათა ჯანდაცვის სისტემა მოგვემზადებინა ამ შესაძლო მეორე ტალღისთვის. გარდა ამისა, ახლა მთელ მსოფლიოსაც და ჩვენც უფრო მეტი ინფორმაცია გვაქვს კორონავირუსის შესახებ. თუ ადრე გარკვეულ კითხვებზე პასუხი არ გვქონდა და პირველი დღეების განმავლობაში უფრო ცუდის მოლოდინში ვიყავით, დღეს თუნდაც გაზრდილი ინფიცირების ფონზე პროცესის მართვა შეგვიძლია და ეს იმედისმომცემია. თუმცა ამან არ უნდა გაგვათამამოს, რაც მოხდა აჭარაში და ამან მყისიერად მოგვცა ნეგატიური შედეგი. ვირუსს აქვს თავისი მახასიათებელი - იქ, სადაც მოსალოდნელ ხიფათს არ ითვალისწინებენ, ზიანი გაცილებით დიდია“, - განაცხადა ხუნდაძემ.

ამ დროისთვის საქართველოში კორონავირუსის 3913 შემთხვევაა დადასტურებული, გამოჯანმრთელებულია 1574 ადამიანი, 22 პაციენტი კი გარდაცვლილი. უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.