ამირან გამყრელიძე: ამ ეპიდემიის პირობებში, ძალიან მნიშვნელოვანია, ნებისმიერი სიმპტომის შემთხვევაში, მიმართოთ ექიმს

დადასტურებული შემთხვევების ყველაზე დიდი ჯგუფია სიმპტომიანი პაციენტები და კონტაქტები. ესაა ორი მთავარი ჯგუფი. დღევანდელ დღეს, ამ ეპიდემიის პირობებში, ძალიან მნიშვნელოვანია, ნებისმიერი სიმპტომის შემთხვევაში მიმართოთ ექიმს. ეს სიმპტომებია ის, რასაც ხშირად ვახსენებთ: პირველი - ტემპერატურა, შემდგომ, ხველა, სუნთქვის უკმარისობა, შეიძლება, იყოს ყნოსვისა და გემოს დაკარგვა, - ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ თავრობის ადმინისტრაციაში, საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.

„გასაგებია, ძალიან გადატვირთულია ყველა ცხელი ხაზი, 112, 144, ჩვენი ცხელი ხაზი, 116001, 1505... ამიტომ, მნიშვნელოვანია, რომ თითოეულ ადამიანს ჰყავდეს ოჯახის ექიმი და უნდა იცოდეს, ვინაა მისი ოჯახის ექიმი. დღეს 3 000-მდე ოჯახის ექიმია ქვეყანაში. ის ადამიანები, რომლებიც ბინებზე მკურნალობენ, 3 000, 3 500-მდე ადამიანი, ან - კოვიდსასტუმროებში, სასურველია, რომ იყოს ყოველდღიური, პროაქტიული კონტაქტი ან ექიმის მხრიდან, ან თავად ავადმყოფის მხრიდან“ - განაცხადა ამირან გამყრელიძემ.

მისივე განცხადებით, მიუხედავად იმისა, რომ ყვეყანაში ვირუსს უკვე 143 ადამიანი ემსხვერპლა, ინფიცირებულებთან შეფარდებით, გარდაცვალების პროცენტული მაჩვენებლით, საქართველო კვლავ რჩება ბოლო ადგილზე, ევროპის ქვეყნებს შორის.

„სამწუხაროდ, გვაქვს გარდაცვალების 143 შემთხვევა, რომელიც, პროცენტული თვალსაზრისით, 0.77%-ს შეადგენს. თითოეული გარდაცვალება ტრაგედიია, მაგრამ არსებული პროცენტული მაჩვენებლით, საქართველო, ევროპის ქვეყნებს შორის, ყველაზე ბოლო ადგილზეა“ - განაცხადა ამირან გამყრელიძემ.

დღე-ღამეში საქართველოში კორონავირუსი კიდევ 1 186 ადამიანს დაუდასტურდა, 278 პაციენტი გამოჯანმრთელდა, 7 კი გარდაიცვალა.

ამ დროისთვის საქართველოში კორონავირუსის 18 663 შემთხვევაა დადასტურებული, გამოჯანმრთელებულია 8338 ადამიანი, გარდაიცვალა 143 პაციენტი.

კარანტინის რეჟიმში 6 407 ადამიანი რჩება, სტაციონარში მეთვალყურეობის ქვეშ - 836, კოვიდ-სასტუმროში - 1 420, უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი, 23 მაისს კი, მოიხსნა საგანგებო მდგომარეობა და კომენდანტის საათიც გაუქმდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.